Ave Maria miangkon sa ikatulong dapit

CEBU, Philippines - Gitiwasan sa Ave Maria Sanctuary Park/USJ-R Jaguars ang Prime Asia/UV Lancers sa Game-2, 76-69 sa ilang "best-of-three" series aron angkonon sa ikatulong dapit sa CESAFI Partner's Cup kagabii didto sa Cebu Coliseum.

Ning pagsulat, ang Enervon-C/UC Webmasters ug Hotel Fortuna/SWU Cobras padayon pa nga nagkumbati sa Game-2 sa ilang "best-of-five" final series.

Gawas sa tropeyo, ang Jaguars nakadawat sab og P10,000 nga ganting salapi sa ilang pagpahiluna sa ikatulong dapit.

Milabaw pa unta ang UV Lancers pinaagi sa sunod-sunod nga triples ni Phil Mercader, 61-59 sa nahabiling 6:19 sa duwa. Tungod kay wala ang ilang sentro nga si Gregory Slaughter, kinsa milarga og balik sa kaulohan, nailog sa USJ-R Jaguars ang labaw.

Ang banggiitang guwardiya nga si Armand Ponce maoy mikumbati og maayo   aron mailog og balik ang labaw 63-61. Miabag sab ang laing guwardiya nga si Edmar Pateño, kinsa maoy miinat sa labaw ngadto na singko puntos, 68-63 ug wala na gyud makasugakod ang UV Lancers sukad niadto.

Ang USJ-R Jaguars, mipukan sa UV Lancers sa Game- 1 sa iskor nga 73-62.

Si Ponce kinsa mikudlit og 22 puntos maoy nangulo sa USJ-R Jaguars, samtang sila si Kurt Amores ug Jabe Delfino nagkumboya og 27 puntos.

Si Mercader, kinsa mipupo og 15 puntos maoy nangulo sa pilderong UV Lancers. Si Mercader sayo kaayo nga nanginit nga mao unta ang paglaum sa UV Lancers, apan wala kini makalahutay sa tibuok duwa. Ang iyang back-up nga si Ralph Olivares miamot og 12 puntos.

Puntos Matag Usa

Ave Maria/USJ-R (76) - Ponce 22, amores 15, Delfino 12, Pateño 9, Bibera 8, Duran 6, Llera 4

Prime Asia/UV (69) - Mercader 15, Olivares 12, Lao 8, Dennison 8, Silva 6, Cincoflores 4, Sendrijas 4, Cabahug 4, Calo 4, Lasala 2, Benedicto 2. – BANAT NEWS