Nestea beach volley Mindanao elims ngayon

DAVAO, Philippines - Habang papainit ang summer, umiinit din ang aksiyon sa 2009 Nestea Fit Beach Volley National Circuit sa paghataw ngayon ng Mindanao eliminations sa Tagum Beach Volley Dome at Rotary Park.

Sa kasaysayan ng taunang Nestea event, tanging isang team mula sa Mindanao ang umangat bilang national champion nang mapagwagian ng Mindanao State University ang men’s title sa Boracay noong 2007.

Ngayong taon, 11 men’s at 10 women’s team ang sasabak sa aksiyon sa Mindanao leg, lahat umaasang makakakuha ng upuan sa Boracay stage sa May 6-9.

Ang mga lalahok na koponan ay ang Agusan Institute of Technology, Ateneo de Davao, Capitol, DMMA College of Southern Philippines, Holy Cross of Davao College, Jose Maria College, Maharika Institute of Technology, Mindanao State U-Main, Mindanao State U-Tawi-Tawi, University of Mindanao-Davao, University of Mindanao-Tagum at Xavier University.

Ang top 3 sa dalawang dibisyon ang makakapunta sa Boracay kung saan ang magkakampeon ay tatanggap ng P100,000 premyo at karapatang tawaging pinakamahusay sa bansa.

Ang Luzon elims ay ginanap noong nakaraang buwan sa SM Mall of Asia Bay Area kung saan nakopo ng Far Eastern University ang men’s title at Adamson naman sa kababaihan.

Ang FEU at Adamson ay dating mga national champions, nagwagi sa men;s at women’s title noong 1999 at 2002, ayon sa pagkakasunod.

Ang iba pang Luzon teams na makakarating sa Boracay sa May ay ang Letran at San Beda sa men’s side; at FEU at University of the Cordilleras sa women’s section.

Ang Visayas elims ay nakatakda naman sa Abril 16-18 sa Parkmall sa Mandaue City sa Cebu. Ang nagdedepensang kampeon na Foundation U (men) at Southwestern U (women) ay mula sa Visayas sa torneong hatid ng Ipanema, Speedo, Parkmall in Mandaue City, Cebu, L’Oreal Paris Elseve, Nautilus by PJ Arañador, Mikasa, D’Mall D’Boracay, Tagum Beach Volley Drome at Rotary Park, Hey! Jude Resort, Boracay Mandarin Island Hotel, La Carmela de Boracay Resort Hotel at Crystal Sand Beach Resort.