CEBU, Philippines - Gibaswat sa beteranong commercial cager Aldrin Ocañada ang CSD Power Brokers pinaagi sa iyang krusyal nga three-point ug usa ka acrobatic lay-up aron pagposte og 72-66 nga kadaugan batok sa mas batan-on nga Asian College of Technology (ACT) Cyber Knights ni coach Tata Merced sa nagpadayong 1st M. Lhuillier Kwarta Padala Cup basketball tournament didto sa Consolacion Sports Complex sa miaging gabii.
Ang three-point shot ni Ocañada maoy nakapalabaw og dos puntos sa Power Brokers, 68-66 sa nahabiling 40 segundos sa duwa.
Gikandadohan sa Power Brokers ang kadaugan pinaagi sa duha ka free throws sa beteranong point guard Raul Redulos nga nakahanaw sa damgo sa Cyber Knights pagkutlo og daog.
Si Ocañada mi-iskor og 29 puntos alang sa Power Brokers nga mikulit sa ilang ikaduhang sunod-sunod nga kadaugan. Samtang si JC Ver Paraguya, kinsa mi-iskor og 13 puntos maoy nangulo sa Cyber Knights nga niduwa nga wala ang ilang sinaligang si Elmer Aparice.
Sila si Danny delos Santos ug Jerry Jaca nakatabang sab daku sa kadaugan sa Power Brokers ni coach Romy Cal. Si delos Santos mipupo og 15 puntos, samtang si Jaca miabuno og 11 puntos.
Sa sayo pa, ang 24/7 Convenience Store ni team owner Mark Abadia mipukan sa Salazar Institute of Technology (SIT) Skyblazers sa iskor nga 66-63.
Niadtong Sabado, didto sa Pajo, Lapu-Lapu City, ang Chasel Mae (On-Line) ni coach Mark Tallo mibuntog sa Perfect Freight Forwarders sa iskor nga 69-57 ug ang San Remigio Beach Club mipilde sa host Pajo squad sa iskor nga 74-68.
Si tournament director Mike Roma mipahibalo nga ang duha mobalhin ngadto sa Talisay City karong Sabado ug sa sunod adlaw dad-on kini sa Cogon, Pardo.
Puntos Matag Usa
Unang duwa:
24/7 CS (66) - Alelo 32, Tangarorang 6, Abadia 6, Corets 5, Villagonzalo 5, Gallarde 5, Loyola 4, Joven 3
SCSIT (63) - Anorado 22, Cabrera 13, Gabica 9, Maurillo 8, Aribal 6, Suizo 5.
Ikaduhang duwa:
CSD (72) - Ocañada 29, Delos Santos 15, Jaca 11, Nailon 6, Abobo 4, Abatayo 3, Redulosa 2, Sayson 2
ACT (66) - Paraguya 13, Nuñez 13, Batiancila 11, Pontemayor 10, Doy 9, Conahab 6, Vistal 2, Valencia 2. – BANAT NEWS