Cacoy Cañete milusad sa iyang ikaupat nga libro

CEBU, Philippines - Gilusad na ni Supreme Grandmaster Ciriaco 'Cacoy' Cañete ang iyang labing bag-ong edisyon nga libro -- "Eskrima-Arnis Techniques" kagahapon didto sa Parklane International Hotel, ning siyudad.

Ang maong libro adunay 150 ka pahina ug labing menos 900 ka litrato aron daling sabton ang mga lagda kun unsaon pagkat-on ang maong matang sa Filipino martial arts nga nagsugod dinhi sa Sugbu niadtong 1932. Ang maong libro mapalit sa tag P800 matag usa.

Mao kini ang iyang ika-upat nga libro mahitungod sa eskrima. Ang labing una niyang libro mao ang Doce Pares Eskrima nga napatik niadtong 1988. Gisundan kini sa Pangamot (Barehand Techniques) niadtong 2001 ug dayon ang Eskrido (kombinasyon sa eskrima, jujitsu, judo ug aikido) niadtong 2004.

Matud pa ni Cañete nga ang maong libro daku kaayo og ikatabang dili lang sa buot makat-on og eskrima kun dili sa pagpalambo sa abilidad niadtong nakamao na mogamit og olisi ilabi na ang mga sakop sa polis, militar ug tanod.

Naglaraw si Cañete nga makigtagbo sa mga kadagkuan sa unibersidad o kolehiyo ingon man sa mga opisyales sa Department of Education (DepEd) aron himuon kining instructional materials sa Physical Education (PE) classes.

Ang 89-anyos nga si Cañete, nagkanayon nga nunot sa iyang pagpagawas og bag-ong libro, mas molambo pa ang iyang abilidad sa eskrima. Matud pa niya, nagkihanglan pa siyang mokat-on og daghan tungod kay dili pa siya perpekto bisan pa og 12-anyos pa siya nagsugod sa eskrima.

Si Cañete gipasidunggan na sa 19 ka higayon ug gibayaw siya sa Cebu Sports Hall of Fame niadtong 1977.

Gibutayg usab ni Cañete nga subsob na kaayo ang ilang pagpangandam sa umaabot nga World Eskrima Arnis Championship unya sa Abril 24-26 diha sa City Sports Club-Cebu sa Cebu Business Park.

Pagasalmotan kini sa mga eskrimadors gikan sa Indonesia, New Zealand, Australia, Germany, Poland, USA, Italy, Canada, England, Spain ug host Philippines.

Ang World Eskrima gipaluyohan sab sa Department of Tourism ubos ni Department of Tourism (DOT) Undersecretary Ace Durano nga gihangop sab sa kagamhanan sa dakbayan sa Sugbu kay makatabang kini pagpalambo sa turismo.

Ang lokal nga kagamhanan sa Cebu City Hall ubos ni Bise Mayor Michael Rama mi-aprobar na og usa ka resoluyson nga mohatag og welcome dinner party ngadto sa mga langyaw nga mosalmot sa nahisgutang World Eskrima tournament. – BANAT NEWS