CEBU, Philippines - Grandslam maoy damgo ni kanhi national triathlete Noy Jopson sa dihang makigtakus na sab kini sa Pipti-Pipti Triathlon and Duathlon competition karong adlawa didto sa Loyang, Carmen, Cebu.
Si Jopson, kinsa molumba sa men's open class, naghari sa unang duha ka edisyon sa maong kompetisyon human niya mapuhali ang ubang dekalibreng triathletes sa nahisgutang kategoriya.
Sa laing bahin, sila si RJ Balbuena, Eugene Sanchez, Damon Lim ug Perlito Colegado manalipod sab sa ilang tagsa-tagsa ka titulo.
Mga kategoriya nga tigian sa maong lumba naglakip sa senior 20, senior 30, masters, mountainbike class uban sa women's open, all-locals ug aided class.
May kompetisyon sab sa duathlon ug gibahin kini sa tulo ka kategoriya -- men's open, women's open ug executive class.
Ang triathlon event naglatid sa 300m swim, 15k bike ug 3k run, samtang ang duathlon adunay 3k run ug 15k bike race. – BANAT NEWS