CEBU, Philippines - Pormal na nga buksan karong adlawa ang 1st Inter-Barangay Basketball Competition uban sa 67 ka koponan diha sa Cebu City Sports Center (CCSC).
Ang torneyo nga salmotan sa kabarangayan sa siyudad ug bukirang bahin sa Sugbu gibahin ngadto sa upat ka grupo – South Urban Bracket, South Rural Bracket, North Urban Bracket ug North Rural Group.
Daghan usab ang nag-atang sa mga mahitabong aksiyon sa pagsugod sa maong liga ug usa sa mga gipanglantawan sa mga organizers ug committee mao ang posibleng panag-abot sa mga banggiitang koponan dinhi sa Sugbu.
Lakip sa mga koponan nga gihugon-hugonang modominar sa tagsa-tagsa nila ka bracket mao ang Inayawan ug Mambaling alang sa South Division, Sambag 2 ug Pahina Central alang sa North Division.
Gituohan sab nga makasulod sa finals ang Agsungot, kinsa maoy finalist sa 1st Tomas Osmeña Inter-Barangay League niadtong miaging tuig.
Makampiyon sa Urban ug Rural Barangay mobulsa og P15,000, ang 1st runner-up makadawat og P10,000, samtang P5,000 ug P2,500 alang sa second ug third placers.
Usa sa mga highlights sa opening ceremony mao ang pagpili og best muse sa Rural Category.
Ang basketball competition gipasiugdahan sa Brgy. Councilor’s League of the Philippines Cebu Chapter uban sa suporta ni Cebu City Mayor Tomas R. Osmeña. – BANAT NEWS