CEBU, Philippines - Niabot ang dugay na nga gihandom sa mga Sugbuanong motorcrossers nga night supercross dihang ang 3rd leg sa 2009 MS Motosuit Motocross Series mohimo'g lumba panahon sa kagabhion karong Marso 27-28 diha sa Consolacion racetrack.
Mao kini ang pagtimaan sa labing unang higayon nga night race nga gipahigayon sa Visayas ug Mindanao area.
Ang suporta sa Reliance Motor Sales pinaagi ni Andy ug Teddy Uy, Castrol Power 1 ug sa lungsod sa Consolacion ubos sa liderato ni Mayor Avelino Gungob Sr. ug uban pang nga nagpaluyo daku'g natabang aron matuman ang dugay na nga gidamgo nga supercross event dinhi sa Sugbu.
Ang unang gabii sa duha ka adlaw nga lumba magsilbeng opening ceremonies, pagsinati sa racetrack ug first heat sa third leg. Ang ikaduhang gabii mao ang second ug final heat sa maong kalihukan.
Matud pa ni MS Motosuit big boss ug league organizer Lou Ornopia nga gawas sa makapaukyab nga aksiyon, ang mga dumuduong malingaw sab pinaagi sa pagtan-aw sa fireworks ug live bands.
Matud pa ni Ornopia nga daghang mga bisitang riders gikan sa Manila ang nikompirmar sa ilang pagsalmot ning duha ka adlaw nga kompetisyon.
Sa laing bahin, ang motocross action nga gipaluyohan sa MS Motosuit makita na sa television matag adlaw'ng Domingo gikan sa alas-9 hangtod sa alas-9:30 sa gabii pinaagi sa INTV-CCTN-Channel 47. – BANAT NEWS