Adis Sportswear mo-host sa San Remigio Beach Club

CEBU, Philippines - Ang Adis Sportswear maoy mo-host sa San Remigio Beach Club (SRBC) sa pagpadayon sa 1st M. Lhuillier Kwarta Padala Cup basketball tournament karong gabii diha sa Pajo gym sa dakbayan sa Lapu-Lapu.

Tuyo karon sa Adis Sportswear nga makabangon atubangan sa ilang dumadapig human kini masugamak sa una nilang duwa batok sa CSD Power Brokers niadtong Domingo didto sa USC gym.

Sa sayo pa, ang Hapee-Online ni coach Mark Anthony Tallo mopakita sab sa ilang katakus dihang ilang

sangkaon ang Perfect Freight Logistics.

Matud pa ni tournament director Mike Roma nga ang mga duwa ugma adto ipahigayon sa lungsod sa Consolacion diin ang Power Brokers ni coach Romy Cal nagtinguha nga mokulit sa ilang ikaduhang daog batok sa Asian College of Technology (ACT) Cyber Knights ni coach Tata Merced.

Laing moduwa ugma mao ang Salazar Institute of Technology (SIT) Skyblazers batok sa 24/7 Convenience Store nga gipanag-iya ni Hermes Abadia, ang amahan ni kanhi-UC ug PBL star Mark Abadia. – BANAT NEWS