OZ Racing Grand Prix Series sa Parkmall

CEBU, Philippines - Napulo ka teams ang nipadayag sa ilang partisipasyon sa 2009 OZR Grand Prix Series nga gipaluyohan sa OZ Racing karong Marso 27-29 diha sa Parkmall parking lot.

Naglakip sa mga koponan nga mopakita'g aksiyon sa tulo ka adlaw nga kompetisyon mao ang Team Mac, Team Pidot, OZ Racing, Cyrus Racing Team, Norkis Team, Bradz Racing Team, Brei Bikes, Skut Garage, Team X-Racing ug ang URBC Team.

Malaumon si OZ Racing president Zandro Fajardo nga daghan ang mosalmot ning tuiga tungod sa mga kabag-ohan pinasubay sa international standard sa lumba.

"We have been preparing for this event since last year and we're expecting more riders to join because the competition is now more exciting. We patterened the racetrack and pit area after that of the international standard like the Malaysia Cup," matud pa ni Fajardo atol sa press conference kagahapon didto sa Fine Cuisine sa Parkmall.

Nakalisod ug nakapahinam sa maong lumba kay ang mga riders wala pa masuhito sa racetrace. Gumikan niini, ang Marso 27 gigahin isip practice day aron ang mga partisipante makasinati ug masuhito sa binyu. Sa Marso 28 mao ang qualifying round ug registration, samtang ang race proper himuon sa Marso 29.

Ang Parkmall maoy opening phase sa lima ka leg sa Underbone Motorcycle Racing nga gipasiugdahan sa OZ Racing.

Mga kategoriya nga tigian mao ang beginners' superstock 110, beginners superstock 125, automatic mix open, novice open ug expert open.

Si international rider Dashi Watanabi motambong ning tulo ka adlaw nga lumba nga gipasiugdahan sab sa Yamaha Motors Philippines Inc., Norkis nga girepresentahan sa manager ug business development officer Scout C. Tumulak ug Parkmall pinaagi sa ilang marketing manager Tony Tiu.

Matud pa ni OZ Racing marketing head Chad C. Mascariñas nga ang ilang tumong sa pagpahigayon sa maong lumba mao ang pagpalambo sa paugnat sa kusog ug pagkaplag og bag-ong mga talento sa mga local riders.

Lain pang gisaytan nga mga binyu alang sa nahabiling mga serye mao ang Kartzone sa barangay Mabolo ug Danao City.

Alang sa dugang mga kasayoran sa OZ Racing, mahimong motawag ni Mascariñas sa 412-3329. – BANAT NEWS