Cobras, Webmasters sa Partner's Cup finals

CEBU, Philippines - Ang kiat nga pointguard nga si Eliud Poligrates mipasulod sa iyang crucial 3-point shot sa nahabiling 53 segundos sa duwa aron hatagan ang Hotel Fortuna/SWU Cobras og 76-69 nga kadaugan batok sa Prime Asia/UV Lancers ug ingon man pagsakmit sa katapusang lingkoranan sa finals sa 3rd CESAFI Partner’s Cup niadtong Martes sa gabii didto sa Cebu Coliseum. 

Ang Hotel Fortuna/SWU, kinsa nidaog sa Prime Asia/UV Lancers sa makatulo ka higayon ning tuiga, moharong sunod sa Enervon-C/UC Webmasters sa "best-of-five" championship series nga sugdan karong Marso 24.

Unang nakakuha’g tiket sa finals ang Enervon-C/UC Webmasters human ilang gipaluhod ang Ave Maria Sanctuary Park/USJ-R Jaguars sa iskor nga 96-88.

Ang Prime Asia/UV Lancers misikit sa iskor, 67-68 human sa undergoal ni 6-foot-11 Gregory Slaughter sa katapusang uno minuto sa fourth period, apan sa sunod nga posisyon, si Poligrates kinsa wala mabantayi kalit mitugpo og 3-point shot hinungdan nga mitubo og balik ang labaw sa Enervon-C/UC Webmasters.

Sa ila unyang duwa batok sa Enervon-C/UC Webmasters, si coach   Dodie Miego sa Hotel Fortuna/SWU Cobras nagkanayon nga dili sila mokompiyansa ilabi na nga anaa ang 6-foot-9 nga si June Mar Fajardo, kinsa maoy lig-on hinagiban sa opensa. Apan matud pa ni Miego nga kun nakahimo sila’g pagpugong ni Slaughter, walay katarungan nganong dili nila mapugngan si Fajardo.

Hinuon, ang pangagpas ni Miego unya pa makita sa higayon nga mag-abot ang iyang team ug Enervon-C/UC Webmasters sa Game-1.

Si Poligrates, lumad nga taga barangay Mercedes, Poro sa Camotes Island, maoy nangu sa Hotel Fortuna/SWU Cobras sa iyang 21 puntos ug mao sab ang nahimong best player of the ballgame, si Alfred Belande midugang og 18 puntos, samtang si Eric Zanoria mipuno og 12 puntos.

Si Slaughter mipupo og 32 puntos alang sa Prime Asia/UV Lancers, samtang sila si Harold Cincoflores ug Elmer Mickael Cabahug miamot og 10 puntos matag usa.

Ang Prime Asia/UV Lancers kanunay naglabaw sa unang-duha ka kuwarter, apan ang Hotel Fortuna/SWU Cobras mitak-op sa halftime sa iskor 41-40 human sa 3-point ni Poligrates.

Puntos Matag Usa

Hotel Fortuna/SWU (76) - Poligrates 21, Belande 18, Zanoria 12, Gianchan 9, Pacquiao 6, Jalandoni 4, Armecin 3, Diango 2, Nuñez 1

Prime Asia/UV (69) - Slaughter 32, Cabahug 10, Cincoflores 10, Mercader v7, Olivares 5, Dennison 3, Lao 2. – BANAT NEWS