CEBU, Philippines - Miposte sa ilang ikaduhang daog ang Roble Shipping ni businessman George Uy human gilubong ang Powerball, 91-77 sa Sunriser and Powerball Friendship Cup 2009 basketball tournament niadtong Domingo sa CEC gym.
Ang Powerball mao kanunay ang nilabaw sa unang duha ka kuwarter, 41-31 luyo sa mga paningkamot nilang Vergil Fuentes, Frank Estroba ug Dr. Oliver Seno, apan ang Roble Shipping hina-hinay nga mikamang pinaagi sa pagpatuman sa solidong depensa nilang Anthony Cenabre ug Charlie Abellon.
Ang power forward nga si Ruel Sestoso maoy mikiat og maayo sa Roble Shipping dihang mi-iskor kini og 15 puntos sa fourth quarter sa kinatibuk-an niyang 21 puntos aron pangulohan ang maong kadaugan. Sila si Teyoy Lim ug John Carpio parehong mi-iskor og 15 puntos alang sa Roble Shipping ug si Jingjing Rama adunay 10 puntos.
Sa laing bahin, si Jing Mendoza maoy nangu sa Powerball sa iyang 12 puntos ug laing upat niya ka kauban ang mi-iskor sab og double digits.
Sa sayo pa, ang Unilink midemolis sa Vic Enterprises, 99-83 aron pagkulit sa una nilang daog sa duha. Ang Unilink adunay 1-1 win-loss record, samtang ang Vic Enterprises mitiurok sa 0-2 nga baraha.
Sila si Loiue Navarro ug Ken Adarna parehong mi-iskor og 17 puntos alang sa Unilink, samtang si Paul Quiñanola mitampo og 14 puntos.
Ang pilderong Vic Enterprises gipangulohan ni Boy Maranga sa iyang 19 puntos, gisundan ni Erwin Budiongan pinaagi sa iyang 16 puntos.
Puntos Matag Usa
Unang duwa:
Unilink (99) - Navarro 17, Adarna 17, Anadon 16, Quiñanola 14, Seno 12, Bacaly 8, Tabasa 5, Petallar 4, Kwan 4, Gerali 2
Vic Enterprises (83) - Maranga 19, Budiongan 16, Silvano 14, Peñares 12, Mengana 11, Ho 6, Bullo 4, Uy 2
Ikaduhang duwa:
Roble (91) - Sestoso 21, Lim 15, Carpio 15, Rama 10, Cenabre 8, Uy 7, Aberia 5, Abellon 5, Maquilan 3, Gabatan 2
Powerball (77) - Mendoza 12, Malinao 11, Fuentes 11, Seno 10, Estorba 10, Luces 8, Carhuana 8, Nadera 7. – BANAT NEWS