Cebu Niños, Red Oilers Magsangka sa MisOr leg finals

CEBU, Philippines - Milampos ang defending National Champion M. Lhuillier-Cebu Niños ug ang Quezon Red Oilers sa ilang kulbahinam nga duwa batok sa tagsa-tagsa ka kaatbang niadtong Biyernes sa gabii aron maoy mag-ilog sa korona sa Misamis Oriental Leg sa 2009 Smart Liga Pilipinas Conference II didto sa Xavier University Gym sa Cagayan de Oro City.

Naghangad ang Cebu Niños ni reigning Liga MVP Marlon Basco, kinsa maoy mibuak sa panagtabla, 58-all aron pag-abante og dos puntos, 60-58 sa nahabiling 40 segundos sa duwa.

Misuway og gukod ang Meteors, apan mikagar ang triple ni Mark Moreno ug nakuha ni Mark Ababon ang bola ug gipakapinan pa'g foul.

Ang free throw ni Stephen Padilla maoy nagselyado sa kadaugan sa Cebu Niños, kinsa miharos sa elimination round. Ang Cebu Niños gihatagan og dos puntos nga bonus sa Liga Tour tungod sa ilang pagharos sa eliminasyon.

Si Basco maoy nangu sa Cebu Niños sa iyang 16 puntos, gisundan ni Bruce Dacia nga adunay 14 puntos, si Woodrow Enriquez miabuno og 12 puntos, samtang si Padilla igo lang mi-iskor og sayes puntos.

Ang pilderong Meteors gipangulohan sab ni Mark Yee sa iyang 17 puntos ubang ang 10 ka rebounds, samtang si Mark Kong midugang og 10 puntos.

Sa pasiunang duwa, ang Red Oilers nangayo pa og overtime una nila maangkon ang 90-88 nga kadaugan batok sa Iloilo Mang Inasals.

Puntos Matag Usa

Unang duwa:

QUEZON (90) – Labagala 17, Canizares 14, Macanig 13, Raymundo 13, Williams 8, Garcia 7, Mondragon 6, Guiyab 5, Orias 3, Suguitan 2, Chua 2

ILOILO (88) – Laborte 20, Abaring 15, Tan 13, Senierez 11, Barcellano 10, Garrido 8, Tizon 6, Vergara 5

Ikaduhang duwa:

CEBU (61) – Basco 16, Dacia 14, Enriquez 12, Padilla 6, Aying 5, Cavan 4, Ababon 2, Santos 2

MISAMIS ORIENTAL (58) – Yee 17, Kong 10, Moreno 9, Tagupa 7, Paterno 4, Munoz 3, Daja 3, Sanchez 3, Mente 2. – BANAT NEWS