Gorres, Leyva mibahad og dakung gubat

CEBU, Philippines - Nagrespitohay sa usa'g-usa si Cebuano ring star Z ‘The Dream’ Gorres ug si kanhi IBF minimumweight champion Roberto Carlos ‘Mako’ Leyva atol sa ilang unang panagkita, apan ang mga dumadapig nagpaabot sa ilang dakung gubat nga maoy main event sa gikahinaman nga “Judgement at the Waterfront” ugma sa gabii diha sa Pacific grand ballroom sa Waterfront-Cebu City Hotel and Casino.

Daan nang mideklarar si Leyva nga dakung gubat ang tuyo sa iyang pag-anhi dinhi sa Sugbu, apan si Gorres mitug-an nga sakto na siya sa preparasyon og misamot ka lig-on sa bantamweight.

“My confidence level is high now that I moved up to bantamweight. I’m very comfortable and I feel strong at this weight category,” matud pa ni Gorres. “I’m ready to fight and expect a new Z Gorres.”

Hinuon si Leyva, mipadayag sab sa iyang kaandam aron mahatagan og maayong away si Gorres.

Ang trainer ni Leyva nga si kanhi two-division world champion Raul Perez nagkanayon andam sila bisan pa’g molungtad og dugay ang maong away.

Sa laing bahin, ang kanhi IBF 105-pound titlist Mohammad Rachman, nipadayag nga ang iyang showdown tali ni ALA Stable mainstay Milan Melindo usa lang ka tune-up alang sa umaabot niyang away batok ni WBC champion Oleydong Sithsanerchai karong summer didto sa Thailand.

Walay laing tumong ang bisitang Indon boxers kondili ang pagtumba ni Melindo, kinsa manghod niya og 16 ka tuig.

 Sa laing boxing showdown nga gipasiugdahan sa ALA Promotions uban sa higanteng TV network ABS-CBN ug sa Waterfront Hotel, si RP bantamweight king Michael Domingo makigsinukliay og kumo batok ni Monico Laurente sa Elorde Stable, samtang si James Bacon naglaraw nga mobawos sa ilang rematch ni William Jorge sa Leolets Stables sa Cagayan de Oro City.

Sa undercards si Joseph Von Miñoza moharong ni Rufino Mante, si Marjohn Makahilig mosukod sa abilidad ni Marlon Ariesga, si Ricardo Campana makigbatok ni Jherpol Valero ug si Jomar Cordinillo makigharong ni Ricky

Nuñez.

Ang official weigh-in gitakda karong alas-11 sa buntag diha sa SM City-Cebu Entertainment Center.

Alang sa ticket reservations, mahimong motawag o text ni Jeana sa   0928-5057980 o 0928-5215772 ug mahimo sab sa ALA Promotions Office sa telepono 236-4611. (BANAT NEWS)