CEBU, Philippines - Mikulit og kasaysayan ang CDO Idol Cheese Hotdog/USPF human gipilde ang R. Lapid's Chicharon/Southwestern University (SWU) sud sa upat ka sets aron pag-angkon sa labing unang korona sa women's division sa Cebu Schools Athletic Foundation, Inc. (CESAFI) Partner's Cup volleyball tournament niadtong Domingo sa University of San Carlos (USC)-main gym.
Ang USPF, ang reigning CESAFI champion nakarekober human masugamak sa unang set aron pagpukan sa SWU, 17-25, 25-20, 25-19, 25-18 sa ilang katapusang panagsangka.
Ang SWU ni coach Joerem Yu mihimo'g impresibong labok aron dag-on ang unang set, 25-17 kortesiya nilang reigning CESAFI beach volley champs Danika Yolanda Gendrauli ug Lorie May Layno uban nilang Elizabeth Emnace, Aureen Pero ug Danalie Baquiro.
Hinuon, ang SWU wala makalahutay sa kusog ug nakuha sa USPF ang momentum sa second set, 25-20 luyo sa walay puas nga duwa ug sa lig-ong depensa nila ni Ericka Camille Verano, Apple Seraum ug Jennielou Fernn Villeguez.
Sa ikatulong set, ang SWU nakasikit og uno punto, 17-18, apan si Verano miduslit sa pabilo alang sa ilang 5-0 run nga nakapainat sa ilang labaw, 23-17. Gitapos sa USPF ang maong set, 25-19 pinaagi sa duha ka sunod-sunod nga pangataki ni Verano.
Bisan pa'g nilabaw og sayes puntos, 19-13, ang CDO/USPF ni coach Jordan Paca nakasinati og lisud nga kumbati sa fourth set dihang ang SWU luyo sa mga paningkamot ni Gendrauli mi-rally ug mikitkit sa labaw ngadto na lang sa uno punto, 19-18.
Apan wala motugot ang USPF nga adunay mahitabong rubbermatch dihang sila si Verano, Harlene Ybarita ug Amor Pepito naghugpong aron tumbahon ang SWU, 25-19.
Sa sayo pa, ang Ave Maria Sanctuary Park/USJ-R nangayo pa og lima ka set una maangkon ang kadaugan gikan sa bangis nga Lion Tiger Aerosol/USC, 19-25, 22-25, 25-15, 25-18, 15-8 aron pag-angkon sa ikatulo nga dapit.
Ang USC ni coach Eugene de la Cerna nidaog sa unang duha ka sets pinaagi sa impresibong duwa nilang Jerymie Montalvo, Anna Krist Capinpin, Chona Gesulta, Mary Daylin Escudero, Angelita Ybañez, Rachel Cumba ug Niña Irish Cortes.
Apan ang USJ-R ni Cebu Hall of Famer coach Grace Antigua nakabawi sa sunod nga duha ka sets pinaagi sa mapintas nga atake nilang Joy Bonita, Michelle Simbajon, Rachelle Hannah Singson, Sarah Miculob ug rookie Mytha Pardillo.
Sa deciding set, unang miabante ang USC, 5-1, apan ang USJ-R milusad og 9-0 run aron kontrolahon ang duwa, 10-5 hangtod nga naangkon sa hingpit ang kadaugan.- BANAT NEWS