CSD mipaluhod sa Ave Maria

CEBU, Philippines - Mipabuto og 33 puntos si Jerry Jaca aron pangulohan ang Construction Services Department (CSD) Builders ngadto sa 86-80 nga kadaugan batok sa Ave Maria Sanctuary Park-Team A sa Buanoy Open basketball tournament niadtong Domingo didto sa Balamban, Cebu.

Wala makatiwas og duwa ang top gunner nga si Aldrin Ocañada human makahimo og duha ka technical fouls sa ikaduhang hugna. Si Ocañada igo lang mipupo og 12 puntos.

Tungod sa kainit ug sa pisikal nga duwa, miresulta sab kini sa pagka technical foul ni Roy Arnado sa ikatulong kuwarter.

Ang Ave Maria-Team A nga gilangkuban sa mga varsity players sa University of San Jose-Recoletos (USJ-R) Jaguars, kinsa pulos kuwalipikado moduwa sa umaabot nga CESAFI 2009 season, nakabangon human malubong og 21 puntos, 53-32 ug miabot na lang sa tres puntos, 83-80 sa katapusang 2:55 sa duwa.

Ang Builders ni coach Boboy Cal mipamatuod sa ilang kalig-on aron pagposte og sayes puntos nga kadaugan.

Si Raul Redulosa miposte og 12 puntos alang sa Builders, gisundan ni Jan Montalbo sa iyang 11 puntos.

Ang Ave Maria ni team owner Raffy Senining mipaduwa og duha ka teams sa Buanoy Open. Ang ilang Team B gilangkuban sa mga graduating Jaguars sama nila ni Armand Ponce, Ranulfo Malinao ug Jabe Delfino.

Si Kurt Amores maoy nangu sa Ave Maria sa iyang 13 puntos, samtang si Jose Ricardo Llera mitampo og 12 puntos.

Puntos Matag Usa

CSD (86) - Jaca 33, Ocañada 12, Redulosa 12, Montalbo 11, Abatayo 8, Mangyao 6, Sereño 4, Arnado 4, Sayosn 1, Maspiñas 1

Ave Maria (80) - Amores 13, Llera 12, Villaver 11, Duran 9, Pateño 4, Lapiz 3, Olvedado 3, Senining 3, Bibera 2, Montenegro 1. – BANAT NEWS