Niños Adunay bag-ong players

CEBU, Philippines - Sa tuyo nga makabuylo sa Misamis Oriental Leg sa 2009 Smart Liga Pilipinas Conference II nga mosikad karong adlawa, ang defending National Champion M. Lhuillier-Cebu Niños mikuha sa serbisyo sa duha ka bag-ong players.

Ang sentro kaniadto sa Trace-Laguna Stallions nga si Abraham 'Abby' Santos ug balikbayan Michael 'Mike' Dizon niabot dinhi sa Sugbu niadtong adlaw'ng Lunes ug miapil gilayon og praktis uban sa Cebu Niños diha sa Cebu Coliseum.

Ang 6-foot-5 nga si Santos, produkto sa University of the Philippines-Diliman ug ni-average og 11.3 points ug 8.1 rebounds sa 25 ka duwa sa miaging conference alang sa Stallions ni coach Nomar Isla. Si Santos modugang og kalig-on sa frontline ilabi na sa depensa.

Sa iyang bahin, ang 6-foot-1 swingman nga si Dizon moduwa og big guard ug small forward positions, apan moduwa sab siya isip point guard kun kinahanglanon.

Natawo siya sa Chicago, Illinois sa mga Pinoy'ng ginikanan nga gikan sa probinsiya sa Cavite ug Bulacan.

Si Dizon nakapuyo sa Pilipinas sud sa upat ka tuig diin niduwa siya og nagkalain-laing commercial leagues sa Metro Manila. Niduwa sab siya sa makadaghang higayon dinhi sa Sugbu og mga invitational tournament nga gipasiugdahan ni Cebu Niños coach Raul 'Yayoy' Alcoseba.

Napiang karon ang Cebu Niños gumikan sa pagka-injury sa ilang tulo ka sinaligan nga sila si Ronald Bucao, Alex Cainglet ug Jayford Rodriguez.

Sa pagka karon, ang Cebu Niños nahimutang sa ikalimang dapit sa Liga Tour Standings sa ilang 26 puntos. – BANAT NEWS