CEBU, Philippines - Gikatakdang moabot karong adlawa dinhi sa Sugbu ang kanhi IBF miniflyweight champion nga si Muhammad Rachman alang sa umaabot niyang away batok ni ALA Boy Milan Melindo karong Sabado diha sa Pacific Grand Ballroom sa Waterfront Cebu City Hotel and Casino sa barangay Lahug, ning siyudad.
Ang 37-anyos moabot karong buntag luwan sa Philippine Airlines diha sa Mactan International Airport.
Si IBF 105-pound ruler Rachman makigbinukbukay batok ni WBO Asia-Pacific minimumweight king Milan Melindo alang sa supporting main event sa away ni ALA boxing sensation Z 'The Dream' Gorres ug kanhi IBF minimumweight titlist Robert Carlos 'Mako' Leyva sa "Judgement at the Waterfront" boxing card nga gipasiugdahan sa ALA Promotions ug sa higanteng TV network ABS-CBN.
Si Rachman (62-6-5, 31KOs) sa Indonesia ug Melindo (17-0, 5KOs) mag-abot sa 10-round non-title fight.
Sa iyang bahin, si Gorres 28-2-2, 15KOs) mopakita sa labing unang away ubos sa bantamweight division batok ni Leyva (25-8-1, 20KOs) sa Mexico alang sa 12 ka hugna nga WBO Oriental 118-pound crown.
Sa undercards, si ALA mainstays Michael 'Sunday Punch' Domingo makigsinukliay og kumo ni Monico Laurente sa Parañaque City-based Elorde Stable, samtang si James Bacon makigsangka batok ni William Jorge sa Leolets Stable sa Cagayan de Oro City.
Lain pang magsangka mao si Joseph Von Miñoza sa Talamban, Cebu City batok ni Rufino Manta sa Tagbilaran, Marjohn Makahilig sa Kalibo, Aklan batok ni Marlon Ariesga sa Tagbilaran, Ricardo Campana sa Ermita, Cebu City batok ni Jherpol Valero sa Fil-Aus Gym, sa Mandaue City ug Jomar Cordinillo sa Tagbilaran batok ni Ricky Nuñez sa Fil-Aus Gym.
Sa laing bahin, ang mga tiket mapalit sa mosunod nga mga outlets: ALA Promotions Office (236-4611), ALA Gym-BTC (416-2011), Islands Souvenirs boutique-Ayala (231-2581), USA Sports-Ayala (232-1854) ug Gaisano Mactan Kiosk.
Ang mga tiket nagkantidad og P250 alang sa balcony, P350 sa ballroom, P550 sa ringside, P1,000 sa VIP 3rd Row, P1,250 sa VIP 2nd Row ug P1,500 sa VIP 1st Row.
Alang sa ticket reservations, mahimong mokontak ni Jeana sa 0928-5057980 ug 0928-5215772. – BANAT NEWS