CEBU, Philippines – Masaligon si WBO minimumweight champion Donnie 'Ahas' Nietes nga mopatigbabaw ang iyang stablemate ug suod niyang higala nga si Milan 'Milenyo' Melindo batok sa bisitang Muhammad Rachman sa Indonesia karong Marso 14 diha sa Waterfront Cebu City Hotel and Casino sa barangay Lahug, ning siyudad.
Nagkanayon si Nietes nga anaa ni Melindo ang pabor sa away nila sa kanhi IBF miniflyweight titlist nga si Rachman.
Sa interview sa DyHP-RMN sa programa nga “Pinoy Boxing” nga gidumala nilang Salven Lagumbay ug Edward Ligas, si Nietes nagtuo nga haum ang fighting style ni Melindo aron iyang mapilde si Rachman.
Matud pa ni Nietes nga kabisado na niya ang inawayan ni Rachman tungod kay nahimo niya kining sparmate agi'g pagpangandam atol sa iyang away batok sa Mehikanong si Erik Ramirez.
Matandi na usab ni Nietes ang inawayan sa duha tungod kay naka-sparring na usab niya si Melindo ug natimbang niya nga mas lisud ikaatubang si Melindo ibabaw sa ring.
Sa laing bahin, si ALA chief trainer Editor Villamor mipahibalo nga moabot si Rachman uban sa iyang trainer karong Miyerkules. –BANAT NEWS