Tulo ka luna sa semis ilogan karong adlawa

CEBU, Philippines – Laing tulo ka luna sa semifinal ang ilogan karon diin tulo ka seeded teams nga gipangulohan sa no. 1 qualifier Hotel Fortuna/SWU Cobras moharong sa lower-ranked squads sa pagpadayon sa 3rd Cebu Schools Athletic Foundation, Inc. (CESAFI) Partner's Cup diha sa Cebu Coliseum.

Nakabaton og "twice-to-beat" incentive, ang Hotel Fortuna/SWU Cobras moharong sa No. 8 seed Virginia Premium Corned Beef/CIT Wildcats sa unang duwa nga gikatakda sa alas-4 sa hapon.

Ang second-seed Enervon/UC Webmasters buot sab mo-abante sa semifinals dihang ilang harungon ang R. Lapid’s Chicharon/DBTC Greywolves, samtang ang third-seed Prime Asia/UV Lancers nagtinguha sab nga mo-abante sa semis dihang ilang sangkaon ang no. 6 seed nga CDO Idol Cheese Hotdog/USPF Panthers sa alas-7 sa gabii.

Ang Ave Maria Sanctuary Park/USJ-R Jaguars maoy unang nakakuha og luna sa semifinals human ilang gipalagpot ang no. 5 seed Lion Tiger Aerosol/USC Warriors sa iskor nga 84-74 niadtong Sabado sa gabii didto sa lungsod sa Cordova.

Dili malalis nga ang Cobras maoy “team to beat” ning maong torneyo tungod kay sila maoy labing daghan og sinaligan.

Gawas lang ni 6-foot-11 Gregory Slaughter sa UV ug ni 6-foot-9 June Mar Fajardo sa UC, ang Cobras ang mas daghan og tag-as nga mga reserba nga modominar sa ilawom sama nilang Melvin Divinagracia, Rene Pacquiao, Richard Gianchad, Clifford Maguate, Ritchie Jalandoni, Eric Zanoria ug Gilbert Gallarde.

Dili sab kabintahaan ang Cobras sa backcourt ang hisgutan gumikan kay anaa ang ilang pointguards nga naglakip nilang Aard Diango ug Eliud Poligrates itandi sa ubang playmakers.

Sa laing bahin, ang Webmasters gilauman mogamit sa ilang epektibo kaayong tirada gikan sa three-point territory nga maoy ilang hait nga hinagiban aron pagpukan sa Greywolves.

Sa samang paagi, ang Greywolves maglaum sab nga mangigo ang ilang tirada sa perimeter.

Sa main game, ang Lancers mosandig nila ni Ritchum Dennison ug Harold Cincoflores sa backcourt ug ni Slaughter ug Edrian Lao sa ilawom.

Samtang ang Panthers magsalig sa ilang mga beteranong si Elvis Labares, Randy Colonia ug Michael Sereño. –BANAT NEWS