CEBU, Philippines - Mikulit si Nonoy Jopson ang miguwas nga hari sa 2nd leg sa Pipti-Pipti Triathlon didto sa Catmon.
Ning higayona, gipilde ni Jopson ang laing kanhi sakop sa RP team nga si Gerrie Calinawan sa men's open division. Si Elmo Clarabal mitapos sa ikatulo.
Sa laing bahin, si RJ Balbuena wala makuli sa iyang paglumba sa laing dibisyon diin siya ang naghari sa senior's 20 division.
Napuhalan ni Balbuena ang usa sa mga kanhi gold medalist sa swimming nga si Ralph Arche aron pag-angkon sa kinatas-ang dapit, samtang si Daxkino Sarabosing mikapyot sa ikatulo.
Sama ni Balbuena, si Eugene Sanchez milayat sab sa laing dibisyon ug naghari sa senior's 30 class. Sila si Warren Vergara ug Fred Veloso Jr. mi-okupar sa ikaduha ug ikatulo nga dapit.
Si Damon Lim mao sab ang nanghawod sa master's class human niya pildiha sila si Ric Dizon ug Victor Villamor Jr. nga mipahiluna sa ikaduha ug ikatulo nga dapit.
Gidominar sab ni Perlito Colegado ang "mountainbike" division niadtong nigamit og mountainbikes atol sa cycling action. Gisundan siya nila ni Rico Valentin alang sa ikaduha ug Martin Sios-e, kinsa miangkon sa ikatulo nga dapit. – BANAT NEWS