CEBU, Philippines - Walay puangod nga gilubong sa University of San Carlos (USC)-North Campus ug Don Bosco ang tagsa-tagsa nila ka kaatbang aron makuha ang lingkoronan sa finals sa Tropang Growee 13-Under Division A sa Cebu Youth Basketball League (CYBL).
Ang USC-North miunay og lubong sa ilang igsuong koponan USC-South Campus sa iskor nga 44-27, samtang ang Don Bosco milubong og katunga sa undermanned nga Sacred Heart School-Jesuit (SHS-J) sa iskor nga 52-26.
Igo lang milabaw og tres puntos ang USC-North sa halftime, 13-10, apan ilang nakandaduhan ang USC-South sa third quarter hinungdan nga miburot ang ilang labaw, 31-15 paghuman sa maong kuwarter. Wala na makabawi sukad niadto ang USC-South nga maoy nakaingon sa ilang kaparotan.
Sa laing duwa, gibirahan dayon sa Don Bosco ang napiangang SHS-J aron pagposte og 12 puntos sa bentaha sa unang kuwarter, 18-6 ug nainat pa kini ngadto sa 26-8 sa halftime.
Pito ka magduduwa sa SHS-J ang wala makaduwa -- upat niini ang nasakit ug ang tulo padayon pa nga nagpaalim human madutli og flu.
Ang USC North-Don Bosco showdown matawag nga rematch sa Milo BEST SBP tournament championship sa miaging tuig diin ang USC maoy nidaog.
Sa lain pang duwa, ang PAREF Springdale mipahiluna sa ikatulo sa Tropang Growee 10-Under Division human nila gipilde ang Royal Oaks International School, 13-12.
Sa Tropang Growee 13-Under Division-B, ang University of San Jose-Recoletos (USJ-R)/Ave Maria Sanctuary ug ang Don Bosco-B mao sab ang mag-engkuwentro sa kampiyonato human midaog batok sa
ilang tagsa-tagsa ka kaatbang.
Ang USJ-R nimasaker sa USC-North-B sa iskor nga 53-24, samtang ang Don Bosco-B mipukan sa Southwestern University (SWU) sa overtime, 44-37.
Nakabangon ang SWU human masukarap pinaagi sa paglubong sa USC-North-B, 46-22 aron pag-angkon sa ikatulo nga dapit sa maong dibisyon.
Sa 16-Under Divison-B, ang Salazar Colleges of Science and Institute of Technology (SCSIT) misakmit sa ikatulo human gipilde ang Don Bosco-B sa iskor nga 70-63.
Ang championship games sa Tropang Growee 10-Under, 13-Under Division-A ug 16-Under Division-A duwaon karong Sabado. – BANAT NEWS