CEBU, Philippines - Mogawas na unya karong Marso 15 and bag-ong libro nga sinulat sa tinamod ug banggiitang eskrimador sa tibuok kalibotan nga si Grandmaster Ciriaco 'Cacoy' Cañete.
Padayon pa hinuon karong gipatik ang maong libro nga nag-ulohan Eskrima-Arnis Techniques nga dul-an sa 150 ka pahina nga gilakipan og 900 ka mga hulagway.
Laraw karon sa pamilyang Cañete nga pormal nga ilusad ang maong libro sa Parklane Hotel sa Marso 10. Mao na kini ang ika-upat nga libro nga nagtuki kun unsaon pagpalambo ang eskrima ug aron gyud sayon sabton bisan pa ngadto sa mga kabataan, gipatabanan og letrato ang matag pahina.
Malipayon si Cacoy nga mogawas na gyud ang maong libro nga taud-taud na niyang gipaningkamotan kay bisan pa sa kahigpit sa iyang inadlaw’ng bulohaton ug bisan pa gani sa iyang pangedaron nga 89 anyos migahin siya’g mga panahon pagsulat sa maong libro. Matud pa niya iyang isugyot sa mga kadagkuan sa unibersidad ug kolehiyo nga gamiton ang maong libro sa mga Physical Education (P.E.) instructors aron mapalambo pag-ayo ang eskrima nga gipalabong sa mga managsuong Cañete gikan pa sa tuig 1932.
Sa kasamtangan, mitug-an si Cañete nga wala pa hinuon siya makahinabi ni bisan kinsa nga tag-iya ug mga opisyal sa mga tunghaan dinhi sa Sugbu kay tuyo niya nga humanon gyud una ang pagpatik aron iya usab mapulsohan ang mga reaksiyon sa katawhan kalabot sa maong libro.
Si Cacoy nagkanayon nga ang maong libro mahalin daw "hot cake" didto sa Estados Unidos ug ubang mga dapit sa Europe. Aduna kini singko mil ka kopya.
Posible nga diyotay na lang ang madala ni Cacoy nga libro ngadto sa Estados Unidos sa iyang pagbalik unya sa Mayo tungod kay anhi ra kini mahurot sa Sugbu atol unya sa ipahigayon nga World Eskrima seminar sa City Sports Club-Cebu sa Cebu Business Park sa Abril 24-26.
Gikatakda man gud nga adunay 11 ka foreign teams ang mobisita dinhi sa Sugbu nianang panahona ug labing menos 200 ka partisipante ang mohugop sa maong torneyo.
Hipanglantawan ni Cacoy nga ang Australian team mopalit og binulto kay ila man usab kining ibaligya didto sa lain-laing lugar sa Australia.
* * *
Tungod sa dakung kalamposan sa bag-o lang natapos nga 14th District Collector’s Cup basketball tournamnet, gibutyag ni Rady Abarintos, ang hepe sa Assessment Division ug usa sa tigpasiugda sa liga nga ila nang himuon nga 3-Conference ang torneyo. Daghan ang nadasig sa gipakitang katakus sa mga organizers nga naglakip ni Abarintos ug mga opisyales sa Customs Employees and Brokers Union (C.E.B.U.).
Nasakmit sa Amancia Brokers ang kampiyonato sa 35-old below division pinaagi sa pagpukan sa Assessment Division, samtang ang Mactan Hotmen sa akong higala nga si head coach Dacky Ugay ug Collector Bingo Matugas, misakmit sa korona sa 35-above division nga walay tatsa (8-0) human ilang gipakamang ang Office of the Commissioner.
Matud pa ni Dione Edera, sakop sa Customs Intelligence and Investigation Service (CIIS) ug bana sa akong ig-agaw'ng broker nga si Gwena, mobalik sunod torneyo ang CIIS ubos sa ambungan ug maabtikon nga kanhi konsehal Rico Rey Francis 'Koko' Holganza.
Apan matud pa ni Edera, kini ubos sa kondisyon nga ibalik sa MJDL ang ilang player nga si Danny Infantado nga gihulman gikan sa CIIS.
* * *
SG Miscellaneous. Belated birthday greetings to my niece Dezza Karylle Po Narvasa who celebrated her fourth birthday last February 18. - BANAT NEWS