CEBU, Philippines - Miugkat ang Mambaling og tagduha ka golds, silvers ug bronzes aron dominahon ang 14th leg sa Go Ching Hai-Martina and M. Lhuillier Kwarta Padala Cup Dancesport and Hip-Hop Competition didto sa Brgy. Tisa, ning siyudad.
Sila si Sunrish Conde ug Chezka Anoza maoy mihatag og duha ka bulawan alang sa Mambaling pinaagi sa juvenile latin ug modern standard competition.
Ang host Tisa nipahiluna sa ikaduha nga mihakot og usa ka gold ug usa sab ka silver kortesiya sa ilang pambato sa youth division nga sila si Mark Joseph Becite ug Kristel Gucor.
Nagsawo ang Buhisan ug Tejero sa ikatulong dapit nga mikabkab og usa ka gold matag usa.
Ang Lahug ug Cogon-Pardo mitapos sa kompetisyon pinaagi sa pag-ani og usa ka silver ug usa sab ka bronze matag usa, samtang ang Hipodromo ug Guadalupe parehong mibugwal og tag-usa ka silver.
Sa laing bahin, sila si Becite ug Gucor nanghawod sab sa youth latin ug standard, ingon man sab sila si Lorraine ug Dominic Pacana sa juvenile latin ug John Lexlis ug Jane Montero sa junior latin.
Sa hip-hop competition, ang Apocalypses mao ang nidominar, gisundan sa Higher Impact ug sa Play Boiz nga mi-okupar sa ikaduha ug ikatulo nga dapit. - Yoyo R. Abayan (BANAT NEWS)