RP Team nasugamak sa Cebu Niños

CEBU, Philippines - Gipamatud-an sa M.Lhuillier Kwarta Padala-Cebu Niños nga sila gihapon ang numero unong commercial squad sa nasud dihang ilang gipaluhod ang batan-ong Smart Gilas-RP Development Team sa iskor nga 82-76 sa ilang exhibition game niadtong miaging gabii didto sa University of San Carlos (USC)- Main gym.

Ang Cebu Niños ni team owner Michel J. Lhuillier ug coach Raul “Yayoy” D. Alcoseba nipatuman og hugot nga depensa dihang gilimitahan nila og dos puntos ang National Team sa nahabiling tres minutos sa duwa.

Gawas sa lig-ong depensa, gipakita usab sa Niños ang ilang kabangis sa opensa pinaagi sa pagpaulan og mga puntos lakip na ang unom ka free-throw shot sa nahabiling 34 segundos sa final period.

Ang gwardiya gikan sa Far Eastern University (FEU) Tamaraws nga si Mark Barocca ug La Salle superstar JV Casio mao ang nangulo sa opensa sa Nationals nga naglabaw og tres puntos sa dayung tapos sa first quarter, 20-17.

Gikan didto ang Nationals nga gipangulohan ni Serbian coach Rajko Toroman nipadayun sa ilang nindot nga opensa ug gilubong nila ang Niños og 11 puntos, 52-41 sa second half.

Tungod sa bangis nga atake sa National Team, nahigmata ang mga sinaligan sa 2008 Liga Filipina champion. Ang sentro nga si Marlon Basco mipasulod sa itsa aron tablahon ang duwa 74-all sa nahibiling dos minutos sa duwa, samtang ang free-throw ni Woodrow Enriquez maoy nikandado sa ilang kadaugan.

Puntos matag usa :

M. Lhuillier-Cebu (82) - Padilla 17, Mepaña 16, Enriquez 14, Dacia 14, Basco 10, Tangkay 6, Aying 3, Capati 2

Smart-RP Team (76) - Barocca 19, Baracael 15, Casio 11, Cawaling 11, Ramos 10, Slaughter 3, Arao 3, Taylor 2, Ballesteros 2

Quarterscores:20-17, 46-38, 63-62, 82-76. —Lemuel P. Maglinte (BANAT NEWS)