CEBU, Philippines - Usa ka dakung rally ang gihimo nilang Freddie Niñel ug sa magsuong Jephe ug George Giducos sa Amancia Brokers, kinsa mipukan sa Assessment Division, 89-77 aron ilogon ang korona sa 35-below category sa 14th District Collector’s Cup basketball tournament niadtong Miyerkules sa gabii didto sa Vicente Sotto Memorial Gym sa barangay Punta Princesa, ning dakbayan.
Sa 35-above category, ang Mactan Hotmen ni head coach Dacky Ugay mao sab ang misakmit sa korona pinaagi sa pagpukan sa Office of Commissioner (O-COM) sa iskor nga 87-71.
Ang Assessment Division nilabaw og uno punto, 71-70, apan si Niñel, kinsa maoy nahimong MVP miposa og upat ka sunod-sunod nga puntos aron hatagan ang Amancia Brokers og tres puntos nga abante, 74-71 sa nahabiling kuwatro minutos sa duwa.
Nagtakilid sab ang Assessment tungod sa daghang usik sa assists ni Dondon Cadungog ug ingon man ang pagkapiang ni Beking Rollon sa tunga-tungang bahin sa final quarter.
Dihang ang Amancia ni coach Francis Aliposa sa UV Customs Department mi-abante og dos puntos, 74-72 sa nahabiling kuwatro minutos sa duwa, kalit lang usab naguba ang duwa sa Assessment Division hinungdan sa ilang kapildihan.
Si Niñel kinsa maoy nagduslit sa dakung rally, maoy nangulo sa Amancia sa iyang 25 puntos, samtang ang managsuong Giducos mitampo og nuybe puntos matag usa.
Sila si Rollon ug Tata Laborte nga pulos mi-iskor og 20 puntos mao sab ang nangulo sa pilderong Assessment Division.
Sa sayo pa, ang Hotmen ni team manager Mactan Collector Ernesto Urbano mi-arangkada sa second half aron ilubong ang O-COM sa usa ka pisikal kaayong duwa.
Si Ronnie Ruiz maoy nangulo sa Hotmen pinaagi sa iyang 21 puntos, samtang ang ex-CIT Wildkitten nga si Jumie Ararao midugang og 19 puntos. Laing mikudlit og double figures alang sa Mactan mao sila si Ronnie Clavano nga adunay 15 puntos ug si Pitoy Mata sa iyang 11 puntos.
Ang O-COM gipangulohan ni Wilher Daan, kinsa mirehistro og 26 puntos.
Puntos Matag Usa
Unang duwa:(Finals 35-above)
Mactan (87) - Ruiz 21, Ararao 19, Clavano 16, Mata 11, Matugas 5, Aurita 4, Sillar 3, Lawas 2, Amores 2
O-COM (71) - Daan 26, Davila 16, Duran 10, Herbito 7, Solante 4, Dela Peña 4, Basalo 2, Tumakay 1
Ikaduhang duwa:(Finals 35-below)
Amancia (89) - Niñel 25, Tundag 9, G. Giducos 9, J. Giducos 9, Miscala 9, Aliposa 6, Cordova 5, Manulat 4, Oporto 2, Mercado 2
Assessment (77) - Rollon 20, Laborte 20, D. Enriquez 6, Cadungog 5, Navaja 4, Piañar 3, Enriquez 3, Francia 3, Ocon 3, Arreglo 2, Perez 2. – BANAT NEWS