CEBU, Philippines - Pagbilanggo ug pagpalagpot gikan sa serbisyo maoy isilot ngadto sa mga coaches ug magtutudlo nga malambigit sa tikas sa Palarong Pambansa o sa mas ubos nga athletics meets.
Kini maoy gipasidaan ni Department of Education (DepEd) Undersecretary Franklin Sunga ngadto sa tanang tournament managers atol sa press conference didto sa Oriental Negros division office niadtong miaging adlaw.
Matud pa ni Sunga nga sa miaging tulo ka tuig wala na siya makadawat og yangungo sa pagpanikas human sa mga eskandalo nga nalambigit sa over-aged athletes sa Palaro.
Bisan pa niini, si Sunga nagkanayon nga ilang gipahinumduman ang tanang hintungdan sa pagtuman sa ilang katungdanan pagtukod ug ingon man paghashas kon screening sa mga atleta.
Ang masakpang moapil sa tikas ubos sa DepEd-sanctioned events mag-atubang og administrative ug criminal charges.
Sumala pa ni Sunga, ang criminal case nga mao ang palsipikasyon sa mga publikong dokumento pahamtangan og unom ka tuig ug usa ka bulan nga pagkabilanggo, samtang ang administrative case moresulta sa pagkatangtang gikan sa serbisyo.
Mga tunghaan ug opisyales kinsa malambigit sa pagpanikas makaangkon sab og susama nga silot. (BANAT NEWS)