Bukidnon, Davao naghari sa Governor's Cup 2009

CEBU, Philippines – Naghari ang mga notadong cowboys gikan sa Bukidnon ug Davao sa Barrel race category sa Governor's Cup 2009 "A Horse Show and Competition" niadtong Domingo didto sa Cebu Boardwalk sa Mandaue reclamation area.

Si Dester Undac sa Malaybalay Bukidnon Horsemen's Club maoy naghari sa Youth division human mapuhali ang iyang kaubang si Kimrel Deiparine ug Margus Jimenez sa Bohol-Cebu Equine Owners, Breeders and Sportsmen Association (CEOBSA).

Ang garbo sa Davao Horse Club nga si Patrick Tuazon maoy misakmit sa korona sa Royal class pinaagi sa pagpukan nilang Edward Loop sa CEOBSA ug Bienvenido Aznar sa Davao.

Laing taga-Davao nga si Kobi Troy Tan, misakiyo sa titulo sa Expert division human sa iyang kadaugan batok nilang Andy Tan ug Bunny Sulogan sa Malaybalay, Bukidnon.

Si Patrick John Eleazar sa CEOBSA-Bohol maoy nidominar sa Intermediate class pinaagi sa pagpukan nilang Jayjay Tuazon ug Dean Gonzales nga pulos taga Davao.

Sa Auxiliary division, si Noel Gonzales sa Davao maoy naghari human gipilde si Bon Jove sa CEOBSA ug Roger Birbo sa Cagayan de Oro Horsemen's Club. -BANAT NEWS