CEBU, Philippines – Ang Best Friends Forever team ni team owner Shirley Martin mipukan sa ADG Refrigeration, 81-75 aron pagposte sa ilang ikaupat nga daog sulod sa lima ka duwa sa Punta Princesa Basketball Association (PPBA) basketball tournament didto sa Atillo gym sa barangay Punta Princesa, ning dakbayan.
Sayong naglabaw ang ADG sa iskor, 20-13 pinaagi sa pagtimon sa ilang sentro nga si Kadong Paca ug Ronald Libre, apan kalit lang usab silang namugnaw sa misunod nga tulo ka kuwarter hinungdan nga nasakmit sa Best Friends Forever ang labaw luyo sa paningkamot nilang Junard Ciabo ug Inting Bacalla, 26-14. Gitapos sa Best Friends ang halftime sa iskor nga 39-34.
Katapusang nakasikit ang ADG sa iskor nga 65-67 gumikan kay ang Best Friends wala na magpapiri sa nanghinapos nga bahin sa duwa.
Si Dondon Cadungog maoy nangu sa Best Friends sa iyang 20 puntos, samtang sila si Atty. Jun Felicitas ug Tito Quiros adunay 16 ug 10 puntos matag usa kanila.
Ang ADG Refrigeration gipangulohan ni Keith Dinoy, kinsa mihipos og 21 puntos, 12 niini gikan sa nanghinapos nga bahin sa fourth period.
PUNTOS MATAG USA
Friends Forever (81) - Cadungog 20, Felicitas 16, Quiros 10, T. Atillo 8, Carcueva 6, Trinidad 6, Lucino 4, Ciabo 4, Bacalla 3, Brigoli 2, B. Atillo 2
ADG (75) - Dinoy 21, Paca 18, Libre 11, Pahamutang 7, Dayondon 6, Rafols 6, Roa 2, Go 2, Masong 2 -BANAT NEWS