Pagara pabiling hari sa PBF lightweight

CEBU, Philippines – Milampos si ALA Boy Jason Pagara pagpanalipod sa iyang Philippine Boxing Federation (PBF) lightweight crown dihang iyang gipilde si JR Sollano pinaagi sa split decision niadtong miaging adlaw didto sa Plaza Lapazan, Cagayan de Oro City.

Ang 16-anyos lightweight prospect kinsa mao usab ang WBO Youth lightweight naglisud pagsulod sa nagbaga niyang mga suntok tungod sa kahugot nga depensa ni Sollano, apan mipatigbabaw kini sa naghinapos nga round.

Sa miaging tuig, si Pagara nidaog sa makaduha ka higayon. Una iyang gipahunong ang Indonesian nga si Herj Andriyanto pinaagi sa third-round knockout niadtong Mayo, gisunod si Kongdej Sithtraitrakan sa Thailand kinsa iyang gitumba sa round four niadtong Agosto diha sa Cebu City Waterfront Hotel and Casino.

Human sa sunod-sunod nga kadaugan batok sa mga langyaw'ng kaatbang, si Pagara misakmit sa Philippine lightweight title gikan sa mga kamot ni Arnel Porras pinaagi sa unanimous decision.

Ang batan-ong si Pagara nagbitbit karon og 17-1, 9KOs, samtang si Sollano nikanaog sa 14-10, 10KOs. -BANAT NEWS