CBM kampiyon sa 1st Osky Mabilog Memorial Swimming Competition

CEBU, Philippines – Dili lang kay ang korona sa overall ang nakuha sa Cebu Blue Marlins Swim Club   kun dili naangkon sab ang katunga sa Most Outstanding Swimmer awardees atol sa 1st Osky Mabilog Memorial Cup National Age-Group Swimming Competition niadtong Domingo sa Cebu City Sports Center (CCSC).

Walo ka swimmers sa CBM nga mihakot og awards kinsa naglakip nilang Rhys Michael Tapang ug Kristina Angelika Torres sa 6-under class, Karen Indaya sa 8-under division, Anthony Linn Navarro sa 10-under, Noel Cañeda sa 17-under ug Michael David Vega, Beverly Vasig ug Aimee Sanchez sa 18-above.

Lain pang swimmers nga nakakuha og award sa managlahing kategoriya mao sila si Angelo dela Cruz sa Palawan ug Kirschtine Balbuena sa General Santos City sa 8-under, Gail Maxine Carvajal sa 10-under, Jethro Chua sa Cagayan de Oro ug Tonie Rose Sayson sa Negros sa 12-under, John Paul Bayona sa Negros ug Lea Martinez sa 14-under ug Bea Felise Garrido sa 17-under.

Gawas sa individual awards, ang mga banggiitang swimmers sa Cebu Blue Marlins nakatabang sab paghimutang sa ilang koponan ngadto sa kinatumyang bahin nga mihipos og 7,356 points ning maong kompetisyon nga ubos sa pagtugot sa Philippine Amateur Swimming Association (PASA).

Bisan og daku kaayo ang ilang labaw batok sa ilang mga kontra sa unang adlaw sa kompetisyon, ang mga batos ni coach Rolando Alvarez wala pul-ig panghakot og bulawang medalya nga naghatag kanila'g agianan aron maangkon ang overall crown.

Si Noel Caneda midugang pa og laing unom ka bulawan, sila si Beverly Vasig ug Jeffrey Yan mitunol og tulo ka gold matag usa, sila si Aimee Sanchez, Rhys Michael Tapang, Kristina Torres, Anthony Linn Navarro ug Danielle Ballesteros miugkat og duha ka bulawan matag usa, samtang sila si Robin Jakobsen, Jose Pantaleon, Lyh Ann Navarro, Michael Ichiro Kong ug Isias Gabunada mihatag og tagsa ka bulawan.

Ang Negros Oriental Blue Dolphins nalandig sa ikaduhang dapit sa ilang 2,376 points, samtang ang Iloilo Sea Warriors nitapos sa ikatulo nga adunay 1,135 points.

Mipahiluna gikan sa ikaupat ngadto sa ika-13 nga dapit mao ang Cagayan de Oro Swim Club (1,874 pts.), Iligan Spring Eels (720 pts.), North Shores Waves Swim Club (680 pts.), Blue Sharks (564 pts.), Dadiangas Torpedoes (539), Binirayan Tadpoles (421), Philspada-Cebu City (280), Palawan Swimming Club (200), University of San Jose-Recoletos (162) ug ang Dipolog Blue Marlins Swim Club (142). -BANAT NEWS