CEBU, Philippines - Nangharus ang duha ka Mindanao-based runners nga sila si Critfrankdel Indapan ug Mary Grace de los Santos sa tagsa-tagsa nila ka dibisyon sa gipahigayung 1st Cebu Rotary Run kagahapon didto sa Cebu Business Park.
Si Indapan maoy nag-una ni Mendel Lopez sa usa ka hugot kaayong kompetisyon sa Men’s Division, samtang si Philip Duenas nisakmit sa third. Mokumpleto sa mga runner-ups sila si Reprinel Banzon (4th place) , Riez Enriquez (5th place), Jimmy Lindayao (6th place), Fernando Lubas (7th place), Angelito Sibayan (8th place), Ruth Banzon (9th place), ug Garry Garcia (10th place).
Sa iyang bahin si De los Santos nipadayon sa iyang pagpangharus sa matag lumba nga iyang gisalmotan dihang gi-apsan niya ang mga banggiitang runners nga sila si Madelyn Carter ug Gerry Rae Baylon kinsa nipahiluna sa ikaduha ug ikatulong dapit. Sila si Melinda Ponce ug Jane Ong mao usab ang fourth ug fifth placer.
Mokumpleto sa top 10 sa women’s division mao sila si Maria Christina Lamparas, Marina Lipardo, Irene Ong, Galil Nacario and Emely Estrada.
Sa laing bahin, wala masayup sa iyang desisyon sa wala pag-apil sa 10k division si Leizsl Lumindas-Gitaruelas aron makapahuway gikan sa Hong Kong Marathon nga iyang gisalmutan sayo ning buwana.
Si Gitaruelas nisalmot sa 5k women’s division diin siya ang nikampiyon uban nila ni Mary Jane Beboso ug Haziel Ratavale kinsa nipahiluna sa second ug third place.
Ang RP weightlifter nga si Emily Rosas nitugpa sa fourth place, samtang ang kanhi singer-actress nga si Donna Cruz-Larrazabal nitungtong sa fifth place.
Sa men’s 5K, giharus sa managsuong Delposo, nga sila si Joel ug Eugene ang first ug second place ug si Jess Gonzaga mao ang third runner-up.
Si Michael Veloso mao usab ang hari sa men’s 3K class uban nila ni Jed Decena, Bethina, Fabby Borromeo ug Christian Martinez. - Lemuel P. Maglinte (BANAT NEWS)