CEBU, Philippines - Naglaraw karon si Leizl Lumindas-Getaruelas nga mosakmit sa titulo sa 1st Cebu Rotary Run nga mosikad karong buntag diha sa Cebu Business Park.
Lab-as pa nga midaog sa ikatulo nga dapit sa iyang kategoriya sa Hong Kong Marathon, si Getaruelas modagan ubos sa 5-K race uban ang paglaum nga mohipos sa iyang unang titulo sa 2009.
Ang pagdagan ni Getaruelas sa 5-K naghatag ni Madelyn Carter og kahigayon nga maghari sa 10-K run. Uban niya mao sila si Marlita Arias, Mary Jane Beboso ug ang batan-ong si Joeyry Lee.
Sa men’s division, si Cresencio Sabal, ang nidaog sa sa miaging Subic leg sa Milo Marathon makiglumba batok sa mga bisitang runners sama nilang Angelito Sabayan ug Cifrankeadel Indapan.
Mga local runners nga naglakip nilang Mendel Lopez, Philip Duenas, Ian Bermedo ug sa managsuong Joel ug Eugene Delposo manalipod sa ilang balwarte batok sa mga bisitang runners.
Ubang mga Sugbuanong personalidad mosuporta sab sa maong kalihukan nga naglakip nliang Miss Cebu 2009 Kris Tiffany Janson, acting Cebu City Mayor Mike Rama ug Dr. Yong Larrazabal ug iyang asawa nga si Donna Cruz-Larrazabal.
Kapin sa 900 runners ang nagparehistro ning maong lumba nga gipasiugdahan ni Andrew Jimenez sa Rotary Club West.
Ang 1st Cebu Rotary Club Run maoy motimaan sa pagsugod sa Rotary Week celebration.
Gawas sa lumba sa dagan, ang lain pang sporting events nga nakalinya sa Rotary naglakip sa golf, badminton ug bowling. – BANAT NEWS