CEBU, Philippines - Gibana-banang moabot ngadto sa 100 ka mga motorcycle riders ang mosalmot sa 1st Underbone Dirt Circuit Racing 2009 Open nga mosikad ugma diha sa South Road Properties (SRP), ning siyudad.
Ang nahisgutang lumba nga bukas sa tanan ug walay age limit gibahin ngadto sa upat ka dibisyon -- underbone, beginners, novice ug experts. Pagasalmotan kini sa mga riders gikan sa Negros, Bohol, Davao ug Dipolog.
Atol sa press conference kagahapon nga gipasiugdahan sa Insigna Global Concepts Consultancy Corporation didto sa Yayoy's Grill and Resto Bar, si Gene Faelnar sa Cebu City Sports Commission (CCSC) nagkanayon nga ang katuyoan sa maong lumba dili lang ang pagdaog kun dili paghatag sab og hustong edukasyon ug disiplina ngadto sa mga riders.
Matud pa ni Cebu City Traffic Operations and Management (CITOM) executive director Arnel Tancinco nga labing menos 12 ka motorsiklo ang ilang ma-impound tungod sa kakulang og dokumento ug abusado nga mopadagan.
Ang maong lumba paluyohan sa Cebu City Sports Commission (CCSC), PPT Lubricants ug Honda Motors, Phils.
Ang kampiyon makadawat og P3,000, ang ikaduha mobulsa og P2,000 ug ang ikatulo makaangkon og P1,000.
Ang registration fee nagkantidad og P150, libre na ang PPT oil. – BANAT NEWS