Kapin sa 700 runners modagan

CEBU, Philippines - Kapin sa 700 runners ang moapil sa Cebu Rotary Run karong Domingo diha sa Cebu Business Park.

Mao kini ang labing unang higayon nga ang Rotary Club mopasiugda og running event.

Atol sa press conference kagahapon didto sa BigFoot, si Rotary Week chairperson Lilu Alino sa Rotary Club of Cebu Gloria Maris miingon nga ang kalihukan nahaom sa pagsikad sa mga aktibidades sa Rotary Week.

Ang lumba adunay duha ka kategoriya -- ang 5K ug 10K run alang sa mga men’s ug women’s division.

Niadtong interesadong moapil, gihatagan lamang hangtod karong Sabado aron sa pagparehistro.

Ang registration centers naglakip sa Freestar Arcade sa Subangdaku sa Mandaue City ug sa Philippine Sports Commission (PSC)-VII office diha sa Cebu City Sports Center (CCSC).

Aduna kini registration fee nga P150 libre na ang singlet.

Ang top performers makadawat og ganting salapi, medals ug gift items.

Human sa lumba sa dagan, ang Rotarians mopasiugda og tulo ka sporting events ug kini mao ang golf, badminton ug bowling. – BANAT NEWS