Assessment Nakasulod sa finals

CEBU, Philippines - Nabaslan sa Assessment Division ang mibiktima kanila nga Amancia Brokers pinaagi sa pagposte og 84-77 nga kadaugan aron pag-angkon og luna sa finals sa 35-below division sa 14th District Collector’s Cup didto sa Vicente Sotto Memorial Gym sa Punta Princesa, ning dakbayan.

Sila si Jogie Navaja ug Viking Rollon maoy nangmangtas aron pangulohan ang Assessment. Si Navaja mibahog og 26 puntos, samtang si Rollon miburak og 25 puntos. 

Sa 35-above division, midaog ang Cebu-Customs United Personeros Association (C-CUPA) batok sa Enforcement Security Service (ESS) Customs Police, 79-71 aron pagsakmit sa ikatulong puwesto.

Sa una nilang sangka, ang ESS ubos sa pagpangulo ni Sanshane Joseph Barita naka-ipsot sa iskor nga 98-97.

Ang Assessment Division ni assistant coach Arnaldo Ciabo miyukbo sa Amancia Brokers sa first round, 78-80. Hinuon, ang Amancia Brokers daku gihapon og purohan nga makasud sa finals tungod kay wala man makatilaw og daog ang SUGBO sa ilang pito ka duwa.

Ang Amancia naghupot karon og 5-2 nga baraha samtang ang SUGBO nahimutang sa kinatumyan sa ilang 7-0 nga baraha.

Puntos Matag Usa

Unang duwa:

C-CUPA (79) - Sena 18, Palad 15,Estrada 11, Sepe 10, Agustinez 6, Martelino 6, Embrada 4

ESS-Police (71) - Sicat 16, Mabalo 15, Cabahug 12, Monteño 10, Regidor 7, De Gracia 5

Ikaduhang duwa:

Assessment (84) - Navaja 26, Rollon 25, D. Enriquez 10, Cadungog 7, Arreglo 6, Perez 2, D. Enriquez 2, Cañete 2, Marata 2, Francia 2

Amancia (77) - Tundag 17, Niñel 14, Cordova 12, Potencioso 7, Miscala 6, Manulat 6, Aliposa 6, Oñate 4, Oporto 4. – BANAT NEWS