Peñalosa nanganti

CEBU, Philippines - Nanganti si WBO bantamweight champion Gerry 'Fearless' Peñalosa nga iyang tumbahon ang Mehikanong si German 'Panteonero' Meraz sa ilang 10 ka hugna nga away nga maoy main event sa "Battle of the Best Bantamweights" karong Sabado diha sa Cebu Coliseum.

"Aw kun magluya-luya siya (Meraz), bukbukon gyud nako siya (If he's too lax, I will definitely beat him up)," matud pa sa 36-anyos nga si Peñalosa atol sa press preview kagahapon diha sa Cebu Coliseum.

Si Peñalosa kinsa nag-ensayo sa iyang gym didto sa Mandaluyong City uban sa IBF/IBO flyweight champion Nonito 'The Flash' Donaire niabot kagahapon dinhi sa Sugbu.

Bisan og non-title, ang away mahinungdanon kaayo alang ni Peñalosa kay mao kini ang taytayan alang sa pakig-away batok sa walay pildeng WBO super bantamweight champion Juan Manuel Lopez karong Abril 24 didto sa San Juan sa Puerto Rico.

Si Peñalosa (53-6, 36KOs) ug si Meraz (20-11, 8KOs) gipaabot nga magsinukliay og mga pulong sa dihang magharong kini karong alas-11 sa buntag sa usa ka press conference diha sa Cebu Grand Hotel.

Ang Peñalosa-Meraz showdown gipasiugdahan ni North Cotabato Vice Governor Manny Piñol ug ni SGG Promoter Sammy Gello-ani.

Mao kini ang ikaduhang away ni Peñalosa sukad niya gipakanaog sa trono ang Mehikanong si Johnny Gonzalez pinaagi sa seventh round knockout niadtong Agosto 12, 2007 didto sa Arco Arena sa Sacramento, California.

Napanalipdan niya ang bakus pinaagi sa eight round stoppage ni Thai Ratanachai Sor Vorapin niadtong Abril 6 sa miaging tuig didto sa Araneta Coliseum.

Sa iyang bahin, ang 22-anyos nga si Meraz, nidaog og pito sa iyang 12 ka away niadtong 2008 lakip na niini ang sunod-sunod nga kadaugan pinaagi sa fifth-round TKO sa iyang kadugong Mehikano nga si Juan Chabelas.

Mopakita sab og aksiyon sa supporting main event si Rolando 'Smooth Operator' Magbanua, kinsa moatubang sa Mehikanong si Jose Angel Cota alang sa WBO Oriental bantamweight interim title. – BANAT NEWS