CEBU, Philippines - Moabot ning semanaha ang kanhi Mexican Pacific Coast flyweight champion German 'Panteonero' Meraz uban sa iyang kababayan nga si Jose Angel 'Bocho' Cota alang sa “Battle of the Bantamweights” karong Pebrero 21 diha sa Cebu Coliseum.
Si Meraz, lumad nga taga- Hermosillo, Mexico gikatakdang moabot dinhi sa Sugbu karong Miyerkules sa buntag pipila ka adlaw sa dili pa ang away niya batok sa World Boxing Organization (WBO) bantamweight champion Gerry Peñalosa.
Uban ni Meraz mao ang iyang trainer nga si Roberto Valenzuela.
Ang away ni Peñalosa batok ni Meraz magsilbeng tune-up bout agi'g pagpangandam sa iyang pakigbangga sa superbantamweight champion Juan Manuel Lopez karong Abril 24.
Sa iyang bahin, si Cota uban sa iyang handlers nga sila si Arturo Franco ug Joseph Steve motugpa karong adlawa gikan sa Mexicali, Mexico.
Sangkaon ni Cota ang undefeated bantamweight prospect Rolando Magbanua alang sa WBO interim bantamweight Oriental title. (BANAT NEWS)