Don Bosco mihakot duha ka titulo

CEBU, Philippines - Mihakot og duha ka titulo ug tulo ka runner-up trophies ang host Don Bosco Technology Center sa 2009 Don Bosco Football Festival sa ilang kaugalingon tugkaran sa Brgy. Punta Princesa, ning siyudad.

Sikit nga nagsunod sa Don Bosco ang Guissepe nga midaog og duha ka titulo, samtang ang Sacred Heart School-Jesuit nibira og usa ka titulo sa lima ka age brackets.

Ang Don Bosco nidominar sa 10 ug 14 under divisions.

Ang Don Bosco Team 1 mipukan sa ilang igsuong Team 5, 2-0 aron langkaton ang Players 10 title.

Sa under-14 final, nag-unay sab ang mga koponan sa Don Bosco diin ang ilang Team B milatigo sa Team A, 1-0.

Napugngan sa Guissepe ang pagpanghakot og laing titulo ang Don Bosco dihang ilang gilangkat ang titulo sa Players 8 pinaagi sa 1-0 nga kadaugan batok sa Don Bosco Team 6.

Midaog sab ang Guissepe girls 17-under human gipilde ang SHS-Hijas de Jesus, 2-0 pinaagi sa penalty shootout sa final.

Sa laing bahin, ang SHS-J milangkat sa korona sa boys 12 human gipilde ang Cardex A sa iskor nga 4-2. (BANAT NEWS)