SWU misakmit korona sa women's division

CEBU, Philippines - Napuhalan sa Southwestern University (SWU) nilang Yolanda Gendrauli ug Lorie May Layno ang kanhi way pildeng University of Southern Philippines Foundation (USPF) nilang Ericka Camille Verano ug Harlene Ybarita sa sunod-sunod nga sets, 21-17, 21-12 aron pagsakmit sa korona sa women's division sa Cebu Schools Athletic Foundation, Inc. (CESAFI) beach volley didto sa Wiggy's Beach Resort sa Liloan, Cebu.

Nilabaw pa ang USPF ni coach Jordan Paca, 16-15 sa unang hugna, apan sila si Gendrauli ug Layno mipabuhagay sa ilang makalisang nga pangatake, 4-0 aron pag-ilog sa labaw, 19-16.

Nakakuha pa og uno punto ang USPF human sa service error ni Gendrauli. Hinuon daling nabawi ni Gendrauli ang iyang sipyat dihang mibunal kini sa dili mabangbang nga atake aron tapuson ang first set, 21-17.

Sa ikaduhang set, ang USPF unang milabaw, 3-0, apan ang SWU milusad og 6-0 nga rally ug nailog ang labaw. Bugtong konsuylo sa USPF mao ang pagtabla sa iskor, 6-all gumikan kay ang SWU mihimo og laing 6-0 nga rally aron inaton ang labaw.

Sa men's division, ang University of San Jose-Recoletos (USJ-R) nakaikyas sa kulbahinam nga duwa batok sa University of the Visayas (UV) sa tulo ka sets aron angkonon ang titulo.

Ang tandem nilang Ariel Carumba ug Louijie Tipgos sa USJ-R nanginit sa pagsugod sa duwa aron pagtumba sa UV nilang James Ryan Rivera ug Jade Becaldo.

Giangkon sa USJ-R ang unang set, 21-13, apan ang maisugong UV mibawos sa second set pinaagi sa pagposte og nipis nga kadaugan,21-20 aron pagpursigar ngadto sa rubbermatch.

Sa deciding set, padayon ang hugot nga kumbati sa duha, apan ang USJ-R maoy mipatigbabaw sa maong kulbahinam nga aksiyon.

Sa sayo pa, ang USPF nilang Edward Ybañez ug Christopher Ryan Abut mipahiluna sa ikatulo sa men's division human gipilde ang University of San Carlos (USC) nilang Roderick Arenasa ug Kennith Bensig, 21-19, 21-18.

Ang USC nilang Jerymie Montalvo ug Chona Gesulga namungot human sa kapildihan sa ilang men's counterparts dihang ilang gipahimungtan ang USJ-R nilang Joyn Bonita ug Rachelle Hannah Singson, 21-15, 21-19 aron pag-angkon sa second runner-up honors sa women's division.   (BANAT NEWS)