CEBU, Philippines - Kasinatian ug dili kaabtik ang gihimong hinagiban sa PBA Legends pagbuntog sa Pink Tower All Star, 84-81 atol sa ilang exhibition game niadtong Domingo didto sa nagsugwak nga Cordova Sports Complex.
Sila si Kenneth 'Captain Marbel' Duremdes gikan sa South Cotabato ug Bonel 'The Gentle Giant' Balingit gikan sa Kapatagan, Lanao de Norte maoy misiaw og maayo alang sa PBA Legends.
Nagtabla ang duha, 79-all human sa undergoal ni Romulo Benedicto Jr. sa Pink Tower sa nahabiling 1:04 sa duwa, apan sa sunod nga posisyon, si Duremdes mipatuasik sa iyang perimeter jumper aron hatagan ang PBA Legends og dos puntos nga bentaha, 81-79. Nainat ang labaw sa PBA Legends, 83-79 sa nahabiling 30 segundos human sa break-away lay-up ni Peter Naron.
Wala magsilbe ang kapaspas ug kaabtik sa Pink Tower kay grabe man kaayo nakadepensa ang PBA Legends hinungdan nga magpanagana og itsa ang batan-ong mga karibal.
Ang PBA Legends naglabaw og 13 puntos, 69-56 paghuman sa third period human sa lay-up ni Al Solis.
Si Duremdes, ang kanhi PBA MVP kinsa mao na karon ang head coach sa Coca-Cola Tigers, mikabkab og 27 aron pangulohan ang PBA Legends. Si Balingit miabuno og 16 puntos, gisundan ni Naron sa iyang 12 puntos.
Si Romulo Benedicto Jr. maoy nangulo sa Pink Tower pinaagi sa iyang 21 puntos, samtang si Jarjar Degamo miamot og 15 puntos sa iyang 21 puntos, nakakuha’g 24-21 labaw sayo sa second period.
Sa preliminary, ang host Cordova mipukan sa Pink Tower Selection sa iskor nga 93-82.
Ang maong kalihukan gipasiugdahan ni Balingit sa pakigtambayayong sa JJ Farr ug sa local government sa Cordova ubos sa liderato ni Mayor Adelino Sitoy.
PUNTOS MATAG USA
Unang duwa:
Cordova Selection (93) - Berido 17, Tarona 17, Alegado 16, Biongcog 8, Tiro 7, Ando 6, Tiro 6, Varron 5, Alibog 4, Jamin 4, Baguio 1
Pink Tower Selection (82) - Seje 18, Mendoza 11, Pepito 10, Barameda 9, Estrera 8, Torrefranca 5, A Pepito 4, Cedilio 4, Bughao 4, Anhao 3, Ycong 2, Jussac 2
Ikaduhang duwa:
PBA Legends (84) - Duremdes 27, Balingit 16, Naron 12, Demape 6, Cardel 5, Fernandez 5, Cabahug 4, Solis 4, Galinato 4, Duran 1
Pink Tower All-Star (81) - Benedicto 21, Degamo 15, Sendrijas 8, Premacio 8, Aguilar