Pagkaluoy pud

Gipakita ni LA Lakers superstar Kobe Bryant nganong siya maoy reigning MVP sa NBA ug ingon man usa sa mga lig-ong kandidato nga mokabkab sa maong pasidungog karong season. Iya man gud napalig-on ang iyang liderato pinaagi sa paggiya sa Lakers sa nagkadena nga kadaugan bisan og temporaryong wala uban kanila ang usa sa ilang sinaligan nga si Andrew Bynum tungod sa injury.

Si Kobe miratsada og season-high 61 puntos sa pagmasaker nila sa New York Knicks, 126-117, dayon mipugnit og 36 puntos sa 115-107 nilang pagkulata sa Toronto Raptors. Bisan og gitrangkaso, nakamaneho siya'g 19 puntos sa pagpatilaw nila sa Cleveland Cavaliers sa labing una niining kapildihan didto sa ilang balwarte sa kulbahinam nga duwa, 110-109 sa overtime.

Sa miaging adlaw, ang 30-anyos nga si Kobe mipatuasik og 34 puntos sa ilang paglampaso sa Oklahoma Thunder, 105-98. Niadtong higayona, mikulit siya og kasaysayan isip labing bata nga player nga nakatigum og 23,000 puntos sa NBA.

Niadtong Huwebes, si Kobe miyagyag og 37 puntos ugaling lang nabugto ang pito nila ka sunod-sunod nga pilde human sila maparot sa Utah Jazz, 109-113. Sa gipakitang ka-agresibo ni Kobe, adunay nag-ingon nga angayan nga maghinay-hinay siya kay tingalig mahutdan siya og bala ug mokagar ang makina sa iyang opensiba sa playoffs. Apan sa kalibre ug sa kahinog na sa dinuwaan ni Kobe, masaligon ko nga kaya niyang abagahon ang iyang koponan bisan pag taliwala sa mga kalisdanan.

* * *

Naunsa naman ni uy. Sud lamang sa usa ka semana, miulbo ang makauulaw nga taho nga may kalambigitan sa giyukboan unta natong mga bitoon sa sports. Si swimming star Michael Phelps nakuhaan og hulagway nga naghithit og marijuana, si baseball great Alex Rodriguez miangkon nga tiggamitan siya og steroids, samtang ang usa sa labing banggiitan nga boksidor karon sa kalibutan nga si Antonio Margarito nasakpan nga nanikas gumikan sa pagbutang niini og "extra padding" sa sentro nga bahin sa iyang gloves atol sa iyang welterweight fight ni Shane Mosley.

Ang labing makaluluoy sa tulo mao si Margarito. Si Phelps gipahamtangan lamang og gaan kaayong tulo ka bulan nga suspensiyon, samtang gisusi pa sa mga hintungdan kun aduna bay kriminal nga implikasyon ang dili maayong binuhatan ni A-Rod.

Si Margarito nahisugamak ngadto sa pagka-alaot kay gilangkatan sa iyang lisensiya ug gi-ban na sa pamuksing didto sa Amerika. Dungan niini, napapha sab ang higante unta niyang away batok ni Miguel Cotto karong Hunyo. Sayang kaayo kay si Margarito usa baya unta sa mga nasaytan nga posibleng makontra ni Manny Pacquiao sa dili pa kini moretiro.

Para nako angayan lamang nga gipahamtangan sa maong silot si Margarito kay kuyaw kaayo ang ilang gibuhat sa piktanan niyang trainer nga si Javier Capetillo. Simbako og wala sila mabuking ug na-intimano niya og igo sa ulo si Mosley sa maong kumo kansang glove adunay "extra padding." Peligroso kaayo kay moresulta kini sa usa ka trahedya o lagmit kamatayon. Mao nang mirisi kanimo, Margarito. Na hala, panikas pa mo!

* * *

Kay adlaw man karon sa kasingkasing segun sa gisubay natong tradisyon, ako na lang pahimuslan kining higayon pagpadangat sa mainit nakong "Happy Valentine's" ngadto sa tanan natong mga kaigsuonan. Ning maong adlaw, sagad nakong mahinumduman mao si anhing Dr. Casimera Solon, ang usa sa paborito nakong propesor sa dihang nagtungha pa ako sa Cebu Normal University. Dunay usa ka higayon sa among klase sa Literature nga miingon dala ang gamay'ng pasiaw nga dili siya motuo sa giingon ni William Shakespeare nga “If you love her, you cannot see her... because love is blind.” kay alang kaniya "Love is not blind, only lovers refuse to see." Lain pang nakapahimuot nako niadtong panahona mao ang moderno niyang kahulogan sa gugma diin si Dr. Solon nagkanayon: "Love is a vast island of feelings, surrounded by ocean of expenses."

Sa sersoyo nga bahin, samtang ang mga managhigugmaay espesyal nga nagselebrar ug nagsawo sa katam-is sa gugma ug himaya nga gidalit sa pana ni Kupido sa romantikong mga lugar, ang akong higala nga si Lilah Samson diha sa Brgy. Looc dakbayan sa Mandaue hilom nga molupad karong gabii padung sa Australia alang sa mahinungdanong katuyoan.

Hinaut nga sama kapaspas kun molayat ang Kangaroo mao sab ang kadali nimo nga makakaplag og maayong palad sa langyaw'ng dapit nga imong nahimutangan. Malaumon ko nga didto sa Land Down Under makasigpat ka og bulawanong kahigayonan sa makahatag nimo og maayong ugma sa dihang ikaw mo-abli og bag-ong panid sa imong kinabuhi. Gani matud pa ni Ralph Waldo Emerson, "Make the most of yourself, for that is all there is of you." Yadz Lilah, I wish you all the best and may God bless you always and help you fullfill your dreams in life under the wings of His Divine Grace. Bon Voyage!

* * *

Kun dunay mga pangutana o reaksiyon, mahimong mo-email sa [email protected]  tawag sa 253-1276 local 241. - BANAT NEWS