PBA Legends sa Cordova

CEBU, Philippines - Sa labing unang higayon, ang PBA Legends nga gilangkuban sa mga kanhi professional players mopakita sa ilang abilidad batok sa Pink Tower Selection sa usa ka exhibition game ugma diha sa Cordova gym.

Ang PBA Legends-Pink Tower Selection showdown gipaluyohan sa JJ Farr/Balingit Productions Inc. Sports Music and Entertainment Promotions.

Matud pa ni Bonel Balingit, ang Chief Executive Officer ug consultant sa JJ Farr Balingit Productions nga si Kenneth Duremdes maoy mangulo sa PBA Legends.

Si Balingit moduwa sab uban ni coach Elmer 'Boy' Cabahug ug sa iyang assistant nga si Al Solis, Johnedel Cardel, Henry Fernandez, Peter Naron ug Gilbert Demape ug uban pang mga tang-ang ex-pros.

Ang Pink Tower Selection ni JJ Farr sa Doña Rosario Village sa Mandaue City, pangulohan ni Jarjar Degamo, usa sa mga pioneers sa Lapu-Lapu Chiefs sa Inter-City Cup.

Atol sa press conference sa JJ Farr/Balingit Productions kagahapon didto sa 19th floor Board Room A sa Crown Regency Tower sa Club Ultima, si JJ Farr nagkanayon nga mo-promote sila’g mga games, music ug uban pang matang sa entertainment sa nagkalain-laing mga dapit sa Visayas ug Mindanao.

Ning higayona ilang giuna ang Cordova kay daghan siya'g mga higala sa maong dapit ilabi na ni Mayor Adelino Sitoy.

Gawas sa basketbol, ang JJ Farr mo-promote sab og boxing sa umaabot nga mga adlaw.

Matud pa usab niya nga gawas nga mangita sila’g mga talents nga makamao mokanta ug mosayaw ug mga hitsuraan, mohimo sab sila’g proyekto nga independent film kun hapsay na unya ang lakaw sa ilang promotion.

Sumala pa ni JJ Farr, nga ang mga PBA Legends adto temporaryong mopuyo sa Crown Regency Mactan. - BANAT NEWS