Cebu teams nagpanikad na sa Nestea Beach Volley

CEBU, Philippines - Nagpanikad ug andam na ang Cebu teams alang sa Visayas eliminations sa Nestea Beach Volley 2009 diin ang Sugbu mo-host sa labing unang higayon karong Abril 16-18 diha sa Parkmall sa North reclamation area.

Sa miaging tuig, sila si Janelle Tabio ug Florian Gutierrez sa Southwestern University (SWU) mihatag og dungog sa Cebu pinaagi sa paglangkat sa national crown.

Sa wala pa, ang Cebu nanghawod sab sa tinuig nga kompetisyon kortesiya nilang Jusabelle Brillo ug Janez Armie Igot sa University of the Visayas (UV). Si Brillo atua na karon nangindahay sa RP team.

Ning higayona, aduna nay dakung kalainan kay ang SWU moparada sa ilang rookies nga sila si Danika Gendrauli ug Lorie May Layno. Mao sab ang UV, kinsa moparada sa serbisyo nilang Ivy Abella ug Noriena Castro.

Ang University of Southern Philippines Foundation (USPF) mopaduwa gihapon nilang Ericka Camille Verano ug Harlene Ybarita, samtang ang University of San Jose-Recoletos (USJ-R) ni Cebu Sports Hall of Famer coach Grace Antigua moparada sa mga sakop kanhi sa RP Youth nga sila si Genie Sabas ug Michelle Simbajon.

Sa men’s division, ang USPF mokuha sa serbisyo sa ilang prized rookies Edward Ybañez ug Christopher Abut.

Ang kanhi USPF star player nga si James Ryan ug Jade Becaldo maoy ibala sa UV. Ang University of San Carlos (USC) nga wala moapil sa miaging tuig tungod sa National PRISAA Games didto sa Zamboanga moparada nilang Roderick Arenasa ug Kennith Bensig ug ang USJ-R mokuha sa serbisyo nilang Ariel Carumba ug Louijie Tigpos. – BANAT NEWS