Caguioa, 'di pa makakalaro

Muli na namang maghihintay ng matagal ang mga fans ni Mark Caguioa. 

Ibinunyag kahapon ni Barangay Ginebra mentor Jong Uichico na kasalukuyan pa ring nagpapagaling ng kanyang tendonitis injury sa dalawang tuhod ang 6-foot-2 na si Caguioa matapos sumailalim sa isang operasyon noong nakaraang taon sa Los Angeles, California.

 “Kung maihahabol pa namin siya at the end of the (Fiesta) conference, pipilitin namin,” ani Uichico kay Caguioa. “Pero right now, hindi pa siya naglalaro ng basketball, puro jogging lang.”

 Matatandaang sa kabila ng iniindang tendonitis, naging mahalagang sandata pa rin ng Gin Kings si Caguioa sa pagkopo sa korona ng 2008 PBA Fiesta Conference kontra sa Air21 Express, ngayon ay Burger King Fighters.

 Maliban kay Caguioa, hindi pa rin makikita sa darating na 2009 PBA Fiesta Conference, didribol sa Pebrero 28, sina 6’7 Rafi Reavis at 6’2 Junthy Valenzuela bunga ng kanilang broken toe at knee injury, ayon sa pagkakasunod.

 “Si Rafi will need at least two weeks, while Junthy will not be playing for at least 3 months,” ani Uichico, nakakuha ng pamalit sa katauhan nina pointguard Chico Lanete mula sa Purefoods at forwards JC Intal at Doug Kramer galing sa Burger King.

 Nasangkot rin sa nasabing three-team, 11-player trade ang Purefoods na nasambot sina KG Canaleta at Don Allado buhat sa Burger King kasabay ng pagpapakawala kay Lanete sa Ginebra at kina Beau Belga at Chad Alonzo sa Burger King. 

Samantala, kinumpirma rin ni Uichico ang muli nilang pagkuha kay 6’5 Rod Nealy bilang kanilang reinforcement.

 “Nagkausap na kami ni Rod Nealy and we have agreed in principle,” ani Uichico sa 26-anyos na si Nealy, beterano ng European league at produkto ng Houston Baptist University Huskies, isang NCAA Division II school kung saan siya naglista ng mga averages na 28.9 puntos at 11 rebounds bago naglaro sa Israel noong 2005 para sa mga tropa ng Maccabi Haifa, Maccabi Qiryat Biyallik, TSK Wuzburg, Elizur Ramla, Ramat Gan at sa Ciudad De Vigo Basquet sa Spain.

 Nakatakdang dumating sa bansa si Nealy sa Pebrero 15, ani Uichico. (RCadayona)