CYBL 2009 sugdan na

Cebu - Buksan na karon ang Cebu Youth Basketball League (CYBL) 2009 diin siyam ka duwa ang ipahigayon diha sa karaang Sacred Heart School-Jesuit (SHS-J) gym sa General Maxilom Avenue, ning siyudad.

Kawhaa'g siyam ka teams ang mopakita'g aksiyon sa tulo ka nagkalainlaing age group.

Kini mao ang 16-under division, Tropang Growee 13-under division ug Tropang 10-under division.

Ang 16-under division alang niadtong mga magduduwa nga natawo sa 1993, 1994 ug 1995. Ang 13-under alang niadtong layers nga natawo sa 1996, 1997 ug 1998, samtang ang 10-under division alang sa mga magduduwa nga natawo sa 1990, 2000 ug mas bata pa.

Nagtapok sa 16-under division-A mao ang defending champions University of San Carlos South Campus, University of Cebu, Sacred Heart School-Jesuit (SHS-J), Don Bosco College A, University of Southern Philippines Foundation ug University of San Carlos North Campus-A.

Nagpundok sa 16-under division-B mao ang Cebu Institute of Technology, Salazar Colleges of Science and Institute of Technology, SHSJ-B, PAREF Springdale, USJR, Don Bosco College-B, USC North-B ug Bradford Christian School.

Ang Tropang Growee 13-under division-A pangulohan sa defending champion USC North, Royal Oaks International School, USC South, SHS-J ug Don Bosco College-A. Moduwa sa Tropang Growee 13-under division B mao ang USJ-R, Southwestern University, Don Bosco College-B, PAREF Springdale ug USC North-B.

Ang labing batan-ong cagers naglatid sa Tropang Growee 10-under age group. Moduwa niini mao ang PAREF Springdale, USC South, Royal Oaks, Don Bosco College ug SHS-J. – BANAT NEWS