CEBU - Mikudlit og 18 puntos si Jun Nuyda alang sa Orange team nga mipukan sa Red team, 83-79 aron pag-angkon sa katapusang luna sa semifinals sa 8th USC-BED South Campus PTCA, Inc. basketball tournament didto sa USC-South Campus covered court.
Sa sayo pa, ang USC Alumni-North Campus mipukan sa Junel Trucking sa iskor nga 98-94 sa usa ka non-bearing match, samtang ang Green team midaog pinaagi sa forfeiture dihang wala motunga ang Navy Blue, kinsa nakakuha sa ikatulong puwesto sa semis.
Ang crossover semifinals duwaon karong Domingo diin ang Maroon team (4-0) makigsangka batok sa Orange nga gikatakda sa alas-9 sa buntag, samtang ang Yellow team (4-0) makigtigi batok sa Navy Blue.
Sila si Edmund Odulio, Dean Wong ug Jun Monsanto nagkumboya og 74 puntos alang sa USC Alumni. Si Esteban Cesar Ortega mi-iskor og 32 puntos alang sa Junel Trucking.
Si Jun Nuyda maoy nangu sa Orange sa iyang 18 puntos, samtang si Rey Abarquez mao sab ang nangu sa pilderong Red sa iyang 28 puntos.
PUNTOS MATAG USA
Unang duwa:
USC Alumni (98) - Odulio 29, Wong 24, Monsanto 21, Abais 18, Villamor 6
Junel Trucking (94) - Ortega 32, Naron 19, Cala 10, Soco 9, Ribo 6, Cal 5, Nacario 4, Gajudo 4, Calo 4
Ikaduhang duwa:
Orange (83) - Nuyda 18, Abello 12, Honoridez 10, Melgo 9, Nacua 8, Fernandez 7, Cabang 7, Satorre 6, Saavedra 4, Hipolito 4, Gayoso 4, Ramos 4
Red (78) - Abarquez 28, Igpit 18, Lagumbay 8, Cabajar 4, Daan 4, Ablaque 4, Compuesto 4, Mandate 4, Parantar 4 (BANAT NEWS)