Cebu Niños gitiwasan

Cebu - Sa labing unang higayon sa kasaysayan sa Liga Pilipinas, ang M. Lhuillier-Cebu Niños napakyas pag-abante sa leg championship game human ang defending National Champions nasugamak ngadto sa Smart-Pampanga Buddies, 90-86 sa ikatulong adlaw sa Ilocos Sur Leg sa 2009 Smart Liga Pilipinas Conference II didto sa Santo Domingo People’s Center.

Ang maong kadaugan naghatag sa Buddies sa pakigsangka alang sa usa ka duwa nga showdown batok sa walay pildeng Trace-Laguna Stallions, kinsa nidaog sab batok sa host Ilocos Sur Bravehearts sa iskor nga 83-69.

Ang Buddies ubos ni coach Allan Gregorio nagtangag og 2-1 nga baraha, samtang ang Niños ni Michel Lhuillier ug coach Raul ‘Yayoy’ Alcoseba nagbitbit og 1-2 nga baraha ning maong torneyo nga gipaluyohan sa Smart, Air21, Burlington, Laptop Phoneshop, Nature’s Spring ug Accel ug sa Samahang Basketbol ng Pilipinas (SBP).

Si Khiel Misa maoy naghawan sa dalan ngadto sa kadaugan dihang iyang napasulod ang iyang 3-pointer sa nahabiling 30 segundos sa duwa aron hatagan ang Buddies og 88-85 nga bentaha.

Apan si Terrell Theophile, kinsa miposa og walo sa iyang 11 ka itsa maoy nangulo sa kadaugan sa Buddies pinaagi sa iyang 16 puntos gisundan nilang Misa ug Emmerson Oreta nga miabuno og 15 puntos matag usa.

Samtang sila si Marlon Basco ug Stephen Padilla nga parehong miburak og 18 puntos maoy nangulo sa nahatsoy nga Cebu Niños. – BANAT NEWS