Cebu - Gibaswat ni Adrian Laborte ang Assessment team ni coach Rady Abarintos pinaagi sa pagpasulod og duha ka sunod-sunod nga triples aron pag-iskor og 59-56 nga kadaugan batok sa SUGBO Brokers sa bugtong duwa sa 35-below division sa 14th District Collector’s Cup didto sa Mandaue City Cultural and Sports Complex.
Ang Assessment nagtabla karon sa liderato uban sa Amancia Brokers sa managsamang 4-1 win-loss records.
Si Laborte maoy nangu sa Assessment pinaagi sa iyang 18 puntos lakip niini ang duha ka triples.
Ang Assessment maoy naglabaw paghuman sa first period, 17-12, apan kalit lang nahiapsan sa SUGBO, kinsa nakakuha’g 30-29 nga labaw sa halftime. Ang ilang 18-11 nga rally sa third period maoy nakaluwas sa Assessment.
Ang SUGBO wala pay daog sulod sa unom ka duwa.
Sa laing mga duwa, padayong nagmangtas ang Mactan Hotmen dihang ilang gipanitan ang Chamber of Customs Brokers, Inc. (CCBI) sa iskor nga 91-56 ubos sa 35-above category.
Sa sayo pa, ang Office of the Commissioner (O-COM) milubong sab sa Port Operations Division (POD) sa iskor nga 80-63 ubos gihapon sa laing duwa sa 35- above division.
Sa laing bahin ,ang O-COM nagbaton karon og 4-2 nga baraha, samtang ang POD may 3-3 nga baraha.
Puntos Matag Usa
Assessment (59) - Laborte 18, Rollon 8, Enriquez 6, Pianyar 5, Cadungog 4, Marata 4, Ocon 4, Trinidad 2, Francia 2, Perez 2, Arreglo 2
SUGBO (56) - J. Orbina 21, E. Orbina 16, Atillano 6, Maningo 5, Lopez 5, Yu 2, Morre 2, Bongon 2. – BANAT NEWS