Cebu - Mga banggiitang eskrimador sa tibuok kalibotan ang magtagbo dinhi sa Sugbu atol unya sa ipahigayong 5th Cacoy Doce Pares World Eskrima Federation Championships sa Abril 24-26 diha sa City Sports Club-Cebu sa Cebu Business Park.
Ang 89-year anyos nga si Grandmaster Ciriaco ‘Cacoy’ Cañete malaumon nga ang nasud sa Australia ug Indonesia magpadala og labing dakung delegasyon. Ang uban magpadala og labing menos 10 ngadto sa 20 ka partisipante.
Gawas sa host Philippines, ang mga nasud nga moapil sa kompetisyon sa tulo ka adlaw nga eskrima tournament ug seminar mao ang Australia, Indonesia, New Zealand, England, Poland, Germany Mexico, Canada ug ang Estados Unidos.
Ang Australian delegation pangulohan ni Master Vince Palumbo, ang Indonesia pangulohan ni Glenn Gardener ug ang America pangulohan ni Anthony Clemans.
Matud ni Cañete nga adunay labing menos 100 ka mga eskrimador ang mosalmot ning maong internasyonal nga kompetisyon.
Ang unang duha ka edisyon sa tinuig nga torneyo didto himoa sa Los Angeles, California, ang sunod didto sa Indonesia ug ang ikaupat dinhi sab sa Sugbu niadtong 2007.
Sa laing bahin, gipahibalo ni Cañete nga ang iyang bag-ong libro nga nag-ulohan og “Eskrima-Arnis Techniques” mogawas sa merkado sa dili madugay ug ibaligya kini sa dili pa ang dakung kalibukan sa eskrima. – BANAT NEWS