Cebu Niños naka-ipsot sa Iloilo Sur Bravehearts

Cebu - Gisugdan sa M. Lhuillier-Cebu Niños ang pagdepensa sa ilang Liga Pilipinas national championship pinaagi sa paglansang og 87-84 nga kadaugan batok sa host Iloilo Sur Bravehearts sa unang adlaw sa Ilocos Sur leg sa 2009 Smart Liga Pilipinas Conference II niadtong miaging adlaw didto sa Santo Domingo People’s Center sa Ilocos Sur.

Hinugtanay sa bakus ang maong duwa, gani nagtabla kini sa makalima ka higayon ug makaunom ka higayon nga nag-ilogay sa labaw hangtod na sa nahabiling 4:54 sa ikatulong kuwarter dihang si Bruce Dacia mi-iskor pinaagi sa lay-up nga maoy naghatag sa Cebu Niños ni Michel Lhuillier ug coach Raul ‘Yayoy’ Alcoseba og uno punto nga labaw, 54-53.

Sa kalit lang, ang guwardiya sa Ilocos Sur nga si Marvin Yambao gisagpa og technical foul nga naghatod ni Woodrow Enriquez ngadto sa free throw line aron hatagan ang Niños og tres puntos nga labaw, 56-53. Mitubo pa ngadto sa singko puntos ang labaw dihang miligwat og laing dos puntos si Ron Capati, 58-53.

Tungod sa homecourt advantage, ang Bravehearts ni Gov. DV Savellano ug coach Gino Manuel nakasikit sa duwa luyo sa paningkamot ni Yambao, Elbert Alberto ug Pertus Santos. Apan si Dacia miposa og triple ug nasundan sa crucial charities nila ni Mark Ababon ug Danny Aying sa nahabiling 41 segundos nga naghatag og kasiguroan sa kadaugan sa Cebu Niños sa iskor nga 86-80.

Ang Cebu Niños gipangulohan ni Conference I MVP Marlon Basco sa iyang 15 puntos uban ang 11 ka rebounds, gisundan ni Aying sa iyang 13 puntos. Ang pilderong Bravehearts gipangulohan sab ni Yambao pinaagi sa iyang 14 puntos. Sila si Santos ug Ismael Junio miamot og 13 puntos matag usa.

Puntos Matag Usa

Cebu (87) – Basco 15, Aying 13, Ababon 11, Dacia 10, Mepana 8, Enriquez 7, Capati 7, Padilla 6, Cainglet 4, Tangkay 2, Cavan 2, Rodriguez 2

Ilocos Sur (84) - Yambao 14, Santos 13, Junio 13, Alberto 12, Cruz 8, Cabatu 7, Arce 6, Martinez 3, Baluyot 3, Gonzales 3, Galapon 2. – BANAT NEWS